HATAW! D'yaryo ng Bayan hatawtabloid.com
TULOY ang kaso…
‘Yan ay dahil ibinasura ng ikalawang dibisyon ng Korte Suprema ang petisyon ni Malabon Rep. Ricky Sandoval na kumukuwestiyon sa resolusyon ng Ombudsman na kasuhan ang congressman ng graft at malversation of public funds.
Ayon sa pinakamataas na hukuman sa bansa, matibay ang ebidensiya ng Ombudsman upang sampahan ng kaso si Sandoval nang iendoso ang Dr. Rodolfo A. Ignacio Sr., Foundation, Inc., para magpatupad ng mga proyektong pangkabuhayan.
Pinagtibay din ng Korte Suprema ang findings ng Ombudsman nang sabihin nitong bigo ang foundation na inendoso ni Sandoval na ipatupad at iulat ang tamang pagkakagastos sa pondo ng mamamayang Filipino.
Matatandaang hindi ito ang unang beses na nasangkot si Sandoval sa mga alegasyon ng korupsiyon dahil kinasuhan na rin siya sa Sandiganbayan dahil sa umano’y maanomalya niyang pakikisawsaw sa bilyon-bilyong pisong pondo mula sa Malampaya.
Bukod dito, sangkot din siya sa maanomalyang pork barrel scam ni Napoles at fertilizer fund scam kasama ang kanyang asawang si Malabon Vice Mayor Jeannie Sandoval.
WAKAS NA NGA BA
NG POLITICAL CAREER
NI ER EJERCITO?
SINENTENSIYAHAN na ng anim hanggang walong taong pagkakakulong ang aktor na pumasok sa politika na si dating Laguna governor ER Ejercito matapos mapatunayang “guilty” sa illegal insurance deal na kanyang inaprobahan nang siya ay mayor pa ng Pagsanjan noong 2008.
Si Ejercito ay hinatulan ng Sandiganbayan Fourth Division sa kasong paglabag sa Section 3(e) Anti-Graft and Corrupt Practices Act, na may kasamang parusang perpetual disqualification sa public office.
Pero hindi nag-iisa si ER a.k.a. George Estregan Jr., kasama sa nasentensiyahan sina dating councilors Arlyn Lazaro-Torres, Terryl Gamit-Talabong, Kalahi Rabago, Erwin Sacluti at Gener Dimaranan, gayondin ang private respondent na si Marilyn Bruel.
Ang kaso ay nag-ugat sa isang insurance deal na pinasok ng Pagsanjan municipal government sa First Rapids Care Ventures (FRCV).
Ang nasabing deal ay “accident protection and financial assistance” para sa mga turista at kalipikadong bangkero na nagyayaot sa ruta ng Pagsanjan Gorge Tourist Zone.
Pero, base sa mga imbestigasyon wala raw public bidding, at ang kontrata ay ipinagkaloob sa FRCV kahit walang lisensiya o sertipikasyon mula sa Insurance Commission para sa insurance business.
Sa totoo lang, nangayri na rin ito dati kay ER, ‘yun naman ay overspending sa kanyang Statement of Contributions and Expenditures (SOCE) pero nalusutan niya.
Kaya ang tanong, ngayong muli siyang tumatakbong gobernador ng Laguna, malusutan niya kayang muli ang hatol ng Sandiganbayan?!
Aba, kapag nangyari ‘yan, masasabi nating napakapalad ni ER.
Para sa mga reaksiyon, suhestiyon, reklamo at sumbong, magtext sa 0977.705.22.31 o mag-email sa [email protected]. Para sa mga nakaraang isyu ng BULABUGIN please visit https://hatawtabloid.com
BULABUGIN
ni Jerry Yap
