PacMan, Donaire huwaran ng Pinoy – Palasyo

HINIMOK ng Palasyo ang publiko na gayahin ang tapang at determinasyon na ipinamalas ng mga boksingerong Filipino sa Las Vegas para gapiin ang problema sa ilegal na droga, kriminalidad at korupsiyon sa bansa.

Sinabi ni Communications Secretary Martin Andanar, nagtatagumpay ang gobyerno sa isinusulong na digmaan sa tatlong pangunahing suliranin ng bansa kaya kailangan tularan ang tibay ng mga boksingerong Filipino upang matamasa ang tagumpay.

“The courage and grit displayed by our Filipino boxers in Las Vegas are the same qualities we must demonstrate as a nation to rid society of drugs, criminality and corruption. Government has been successfully waging a war on these fronts and we as a people – emulating our boxers’ toughness against all odds — must continue the strong gains as we battle towards victory,” ani Andanar sa tagumpay ni Pambansang Kamao Sen. Manny Pacquiao laban kay Jessie Vargas.

Ani Andanar, nagpapasalamat ang Palasyo sa hindi matatawarang suportang ipinagkaloob ng mga Filipino sa oras ng tagumpay at maging sa panahon ng pagkabigo ng ating mga boksingero.

Muling pinagbigkis ng tagumpay ni Pacquaio ang sambayanang Filipino at nagdulot ng ligaya at karangalan para sa bansa.

Ang ipinakitang disiplina, determinasyon at pagsusumikap ng Pambansang Kamao ang nagluklok sa kanya bilang “National Treasure in Global Sports.”

Ang pagkabigo aniya ni Nonito Donaire ay hindi kabawasan sa mga dinala na niyang karangalan sa bansa at nananatili pa rin siyang “The Filipino Flash” sa bilis at lakas ng kanyang mga kamao.

“Nonito Donaire’s quest to be the ‘king in the ring’ unfortunately did not materialize. This, however, would not diminish the honors he bestowed to the people and to the flag. He remains ‘The Filipino Flash’ with his quick hand speed and formidable punching power,” dagdag ni Andanar.

P48-M TICKETS IPINAMIGAY NI MANNY

HUMAKOT ng tagasuporta si eight-division world champion Sen. Manny Pacquiao para sa kanyang comeback fight kontra WBO welterweight champion Jessie Vargas.

Nabatid na aabot sa $1 milyon o nasa mahigit P48 milyon ang halaga ng biniling 2,000 tickets na ipinamigay ni Pacquiao sa kanyang mga kaibigan, kamag-anak at kapwa politiko.

Malaking halaga ito lalo at hindi natitiyak na tatanggap pa rin ang Filipino ring icon ng $20 milyon kagaya nang kanyang kinita sa ikatlong bakbakan kontra Timothy Bradley noong Abril.

Ayon sa ilang sources, tatanggap lamang si Pacquiao ng porsiyento mula sa kinita ng The Legend vs The Champ fight card.

Samantala, si Vargas ay siguradong tatanggap ng $2.8 milyon.

ni Rose Novenario