HATAW! D'yaryo ng Bayan hatawtabloid.com
ANG dami-dami na palang followers nina Elmo Magalona at Janella Salvador considering na isang teleserye palang ang pinagsamahan nila, ang Born For You na nagtapos na noong Biyernes sa pamamagitan ng The Concert Finale sa KIA Theater.
Akalain mo Ateng Maricris, umapaw ang buong KIA ng ElNella o SamVin (Sam at Kevin) supporters na may mga hawak na red strings at reflector bracelet kaya ang gandang tingnan sa dilim.
Matindi ang hiyawang narinig namin habang kinakanta nina Elmo at Janella ang theme song ng teleserye nilang Born For You at habang ipinakikita sa background ang mga lugar na napuntahan nila sa Japan. May mga magagandang lugar din sa London na kasama sa video.
Nagkaroon muna ng program ang buong cast habang hinihintay ang airing ng BFY na sinabayan na rin ng pasasalamat sa lahat ng hindi bumitiw sa loob ng tatlong buwan sa pangunguna Mr. Freddie Webb, Ms Gina Pareno, Smokey Manaloto, Ayen Munji-Laurel, Francis Magundayao, Katya Santos, Jimboy Martin, Ariel Rivera, Joj Agpangan, Vina Morales, Ogie, Diaz, Elmo, Janella at iba pa.
Samantala, nabitin daw ang mga nakapanood sa telebisyon sa live acting na ginawa nina Janella, Elmo, Ayen, Ariel, Vina, Ogie, at Freddie dahil kaunti lang ang ipinakita.
Intense ang eksenang habang kumakanta si Sam (Janella) ay siyang dating naman nina Marge (Ayen), Ralph (Freddie), at Desdemundo (Ogie) para pigilan ang show ng dalaga.
Ipinahiya ni Marge si Sam habang kumakanta ng awiting isinulat ni Kevin na ibinigay niya sa dalaga na pilit namang inaangkin ng ina ng binata dahil katwiran niya, siya ang legal na may-ari ng kanta dahil contract artist niya ang anak.
Hanggang sa dumating si Kevin at nakipagsagutan sa ina para ipagtanggol si Sam.
Nagulat din sina Mike (Ariel) at Cathy (Vina) at kaagad na nilapitan si Sam na hinihiya ni Marge sa napakaraming tao sa loob ng KIA Theater.
Aliw na aliw naman kami habang tumatalak si Marge at ipinahihiya si Janella ay bina-bash naman siya ng audience at nabaling sa kanila ang galit ng record producer.
Hindi ganoon kadali ang live-acting na ginawa ng major cast dahil nakikita at naririnig nila ang live audience na nagre-react habang umaarte sila mabuti at hindi sila nawala sa konsentrasyon.
Magenta ang production design ng entablado dahil Japan’s inspired ito na may temple at mga bulaklak ng cherry blossom pa na roon nagkakilala sina Kevin at Sam noong mga dalaga’t binata na sila.
Binabati namin ang Dreamscape Entertainment sa magandang pagtatapos ng Born For You.
At sa mga ElNela o SamVin fans, huwag kayong malungkot dahil may next project sila.
FACT SHEET – Reggee Bonoan
