HATAW! D'yaryo ng Bayan hatawtabloid.com
ILOILO CITY – Patay ang isang retired police sa buy-bust operation sa Jeferson Village Brgy. Pali Benedicto sa bayan ng Mandurriao sa Iloilo City kamakalawa.
Kinilala ang suspek na si dating Senior Police Officer (SPO) 1 Wilson de Leon.
Ayon kay Senior Insp. Adolfo Pagharion, hepe ng Mandurriao Police Station sa lungsod, isang buwan tiniktikan ng mga pulis si De Leon na malawak ang area of operation na sumasakop sa mga bayan ng Estancia, Carles at Passi City sa probinsiya ng Iloilo gayondin sa lalawigan ng Capiz at bayan ng Kalibo sa Aklan.
Sinasabing pinaputukan ni De Leon ang police poseur buyer na nakatransaksiyon kaya ginantihan ng putok ng mga pulis.
Isang bulto ng shabu na tinatayang nagkakahalaga ng P15,000 ang nakuha mula sa posisyon ng suspek.
Si De Leon ay panglima sa listahan ng mga napatay dahil sa paglaban sa mga awtoridad ngayong linggo sa Rehiyon 6.
Matatandaang isa ang Police Regional Office-6 sa mga police offices na mababa ang performance sa anti-drugs operation na nakatakdang i-relieve ang mga opisyal batay sa deklarasyon ng chief PNP.
