Supplier ng droga ni Kerwin Espinosa napatay ng PDEA

KINOMPIRMA ng Philippine Drug Enforcement Agency (PDEA), isa lamang ang presong si Edgard Allan Alvarez alyas Egay sa mga supplier ng droga ni Kerwin Espinosa sa loob ng Leyte Regional Penitentiary sa Brgy. Cagbulo, Abuyog, Leyte.

Ayon kay PDEA Region 8 Director Edgar Jubay, Abril 2011 pa nang ilipat sa Leyte Regional Penitentiary si Alvarez mula sa New Bilibid Prisons (NBP) dahil sa kasong murder.

Pahayag ni Jubay, bagama’t murder ang kaso ni Alvarez, may ibang presong kasamahan siya sa loob ng piitan ang sangkot din sa illegal na droga na posibleng pinagmulan ng operasyon.

Kinompirma ni Jubay, may mga susunod pang operasyon sa naturang piitan ngunit sa ngayon ay tumanggi ang opisyal na idetalye ito.

Napatay ang drug personality na si Edgard Allan Alvarez sa loob ng Leyte Regional Penitentiary makaraan makipagbarilan sa mga pulis kahapon ng madaling araw.

TAUHAN NI KERWIN ESPINOSA SINASANAY SA BOMB MAKING

TACLOBAN CITY – Posibleng sinasanay ang mga tauhan ng notorious drug lord sa Eastern Visayas na si Kerwin Espinosa, sa paggawa ng improvised explosive device (IED).

Ito ay makaraaan marekober ng mga pulis ang aabot sa tatlo hanggang apat na kilo ng ammonium nitrate at blasting caps sa bahay ni Mayor Rolando Espinosa sa Brgy. Benolho, Albuera, Leyte.

Ayon kay Senior Supt. Jovie Espinido, hepe ng Albuera Police Station, hindi basta-basta ang dami ng ammuniom nitrate na posibleng ginagamit sa mga pag-atake.

Napag-alaman,  kayang mapasabog ng isang kilong ammuniom nitrate ang isang palapag ng isang gusali.

Nakompiska ang ilang improvised explosive device makaraan ituro ng mga tauhan ni Kerwin.