Drug lords naki-team up sa ISIS, BIFF para patayin sina Duterte, Bato

NAKIPAGSANIB-PUWERSA ang drug lords sa mga miyembro ng jihadist group ISIS at local group Bangsamoro Islamic Freedom Fighters (BIFF) para patayin si Pangulong Rodrigo Duterte, ayon kay Philippine National Police chief, Dir. Gen. Ronald dela Rosa.

“May mga drug lord na nagbabayad, umaabot na sa personalities sa ISIS at BIFF. Lumalapit na sila dahil nahihirapan na sila maghanap ng tirador. To the extent na roadside bomb, car bomb (na ang gagamitin),” pahayag ni Dela Rosa sa press conference sa Davao City nitong Martes.

Ayon kay Dela Rosa, maging siya ay target na rin ng drug lords dahil sa pinatindi nilang kampanya laban sa illegal na droga.

“Sa totoo lang they are now moving heaven and earth,” aniya.

Sinabi ni Dela Rosa, nakatatanggap siya ng mga banta ngunit binigyang-diin na hindi siya natatakot.

“Sanay naman tayo. Tatanggapin ko. I am ready to die anytime. Di ako takot mamatay. Di tayo natatakot diyan. Bahala sila,” aniya.

“Bahala na si Lord kung gusto niya mamatay na si Presidente, kung gusto niya mamatay na ako. He can take my life anytime. ‘Wag kayong mag-alala hindi ako takot,” dagdag ni Dela Rosa.