Road rage suspect arestado sa Masbate

ARESTADO ng Philippine Army Intelligence units ang road rage suspect dakong 11:50 am kahapon sa Brgy. Bangat, Milagrosa, Masbate.

Ayon kay Armed Forces of the Phillipines (AFP) Spokesperson B/Gen. Restituto Padilla, naging mapayapa ang paghuli ng mga sundalo sa dating reservist na si Vhon Tanto at hindi siya nanlaban.

Si Tanto ang suspek sa pagpatay sa cyclist na si Mark Vincent Geralde sa Quiapo sa Lungsod ng Maynila kamakailan.

Patungo aniya sa headquarters ng 9th Infantry Battalion ang suspek habang hinihintay siya ng mga operatiba ng Philippine National Police-Criminal Investigation and Detection Group (PNP-CIDG).

Pahayag ng heneral, gumalaw ang militar sa pagdakip kay Tanto para tulungan ang mga pulis na tumutugis sa kanya.

Mahigpit din ang bilin ni AFP chief of Staff General Ricardo Visaya na arestohin ang suspek.

Makaraan isailalim sa proseso, kanilang ibinigay si Tanto sa PNP at dinala sa Manila Police District na may hawak sa kanyang kaso.

Nilinaw ni Padilla, isang taon nang hindi nagre-report si Tanto kaya tinanggal na siya sa roster at hindi na rin tumatalima sa requirements bilang isang active Army reservist.