Kim Rodriguez wannabe beauty queen

Isang wannabe beauty queen ang gagampanang role ni Kapuso star Kim Rodriguez sa Karelasyon ngayong Sabado (July 23).

Matagal nang hinahangaan ng tindera sa palengke na si Liz (Kim) ang beauty queen ng kanilang lugar na si Joan (Arny Ross). Sa katunayan, si Liz ang maituturing na numero unong fan ng dalaga. Pero para sa bestfriend ni Liz na si Bavelle (Terry Gian), ang kanyang kaibigan ay may natatanging ganda at may karapatan din sumali sa mga beauty contest.

Sa tulong ni Bavelle, sisimulan ni Liz ang mga yapak para maging isang reyna, ngunit imbes matuwa ang kanyang idolong si Joan, ito ang pagmumulan ng inggitan ng dalawang dalaga. Bukod kasi sa paghanga, labis na gagayahin ni Joan ang estilo at itsura ng kanyang idolo, at maging ang boyfriend nitong si Dennis (Ken Alfonso) ay kanyang papangarapin maangkin. Tila isang obsesyon na nga ang nabuong pangarap ni Liz.

Magiging magkaribal sa korona sina Liz at Joan. Pero lingid sa kanilang kaalaman, ang labis na paghanga pala sa kanila ng misteryosong lalaking si Dondon (Kiko Mathos) ang dapat nilang bantayan at ingatan.

Ito ang nakaiintrigang kuwento mula sa panulat ni Jon Verzosa at direksyon ni Zig Dulay ngayong Sabado (July 23) sa Karelasyon kasama si Carla Abellana, pagkatapos ng Eat Bulaga sa GMA 7.

BANAT – Pete Ampoloquio, Jr.