HATAW! D'yaryo ng Bayan hatawtabloid.com
TUGUEGARAO CITY – Iniimbestigahan ng pulisya kung may kinalaman sa negosyo ang pamamaril sa mag-asawa sa bayan ng Solana, Cagayan kamakalawa.
Sinabi ni Chief Inspector Santos Baldovizo, hepe ng PNP Solana, namatay sa insidente si Fortunato Castillo dahil sa apat tama ng bala ng baril sa dibdib at tiyan, habang nilalapatan ng lunas sa pagamutan ang misis ng biktima na si Marieta Castillo, residente ng Brgy. Parog-parog.
Ayon kay Baldovizo, batay sa kanilang inisyal na imbestigasyon, may kausap ang mag-asawa na dalawang lalaki para rentahan ang kanilang baboy na lalaki para sa pagpapalahi.
Pumayag ang mag-asawa kaya isinakay ang baboy sa sasakyan para dalhin sa lugar na sinabi ng mga suspek sa Brgy. Nambutuan.
Ayon kay Baldovizo, nauna ang mga suspek sakay ng motorsiklo nang bigla silang tumigil at hinintay ang mag-asawa.
Sa puntong ito ay pinagbabaril ng mga suspek ang mag-asawa.
Hindi nakilala ng mag-asawa ang mga suspek dahil habang kausap nila ay kapwa naka-helmet ang mga salarin.
