Bitay retribusyon sa krimen — Duterte

ISUSULONG ni President-elect Rodrigo Duterte ang psagbabalik ng parusang kamatayan bilang ganti o ‘retribution’ sa ginawang krimen at hindi para mabawasan ang mga kriminal.

Sa kanyang talumpati kahapon sa inagurasyon ng mga halal na opisyal sa Sarangani sa pangunguna ni Sen. Manny Pacquiao, inihayag ni Duterte ang dalawang “school of thoughts” sa isyu nang implementasyon ng bitay.

Para sa iba aniya, ang death penalty ay para mabawasan ang krimen.

Ngunit para kay Duterte, dahil nakagawa ng krimen ang isang tao kaya dapat siyang maparusahan.

Iginiit ni Duterte, dapat matuldukan ang korupsiyon, illegal drugs at kriminalidad.

Magugunitang umani ng batikos si Duterte mula sa Simbahang Katoliko at pro-life advocates kaugnay sa planong pagbabalik ng death penalty sa pamamagitan nang pagbigti para sa mga nahatulan ng karumaldumal na krimen.

Anila, walang katibayan na bumaba ang bilang ng heinous crimes dahil sa parusang kamatayan.

Matatandaan, noong 2006 ay ipinasa ng Kongreso ang batas na nagbasura sa death penalty sa pamamagitan ng lethal injection dahil sa pagkontra ng mga bansang miyembro ng European Union at Simbahang Katoliko.