Nahulog mula sa gondola, obrero tigok (Sa NAIA expressway project)

PATAY ang isang construction worker makaraan mahulog mula sa gondola sa taas na mahigit 50 talampakan nang mawalan ng balanse at bumagsak sa kalsada sa ginagawang NAIA Expressway Project Phase 2 sa Parañaque City kamakalawa ng gabi.

Kinilala ni Parañaque City Police chief, Senior Supt. Ariel Andrade ang biktimang si Chiquito Montes, 42, ng  Happy Land Magsaysay, Tondo, Manila.

Base sa inisyal na ulat, habang inaayos ng biktima kasama ang dalawang construction worker ang gondola na nasa itaas sa MIA Road at Quirino Avenue, Brgy. Tambo nang mahulog si Montes na naging dahilan ng kanyang pagkamatay dakong 8:30 p.m.

Napag-alaman, biglang may pumutok sa isang poste ng koryente malapit sa gondola na ikinagulat ni Montes na naging dahilan upang mawalan siya ng balanse at nahulog.

Inaalam pa ng awtoridad kung nakoryente ang biktima at kung nasunod ang safety measures na ipinatutupad sa nasabing proyekto.