25 Chinese fishermen arestado (Nagpanggap na Pinoy)

HAWAK na ng Bureau of Fisheries and Aquatic Resources (BFAR) at Philippine Coast Guard (PCG) ang 25 Chinese suspected poachers na naaresto sa karagatang sakop ng Babuyan Island at Batanes province.

Ayon sa BFAR, naaktohang nangingisda ang mga dayuhan na sakay ng Shen Lian Cheng 719 at Shen Lian Cheng 720.

Naghinala ang mga awtoridad na hindi talaga mga Filipino ang nangingisda sa nasabing lugar nang mamataan nilang nakabaliktad ang watawat ng Filipinas na nakalagay sa fishing vessel.

Agad silang dinala sa Basco, Batanes para sa kaukulang imbestigasyon.

Para kay Agriculture Undersecretary for Fisheries Atty. Asis Perez, hindi lang naligaw ang nahuling mga mangingisda dahil malinaw na nagpanggap pa bilang mga Filipino ang 25 dayuhan.

Ano mang oras ay magbibigay ng abiso ang Department of Foreign Affairs (DFA) sa Chinese embassy ukol sa pagkakaaresto sa kanilang mga kababayang mangingisda.