HATAW! D'yaryo ng Bayan hatawtabloid.com
SINIMULAN ng Caloocan City local government unit ang paggamit ng GCash para sa pagkakaloob ng serbisyong pagbibigay ng buwanang allowance sa mga Solo Parents, Senior Citizen Birthday Cash Gift, at Agapay sa Manggagawa.
Kasabay nito, tumanggap ang Caloocan LGU ng Excellence in Digital Transformation Award at Palengke Digital Breakthrough Growth Award mula sa GCash Digital Excellence Award (GDEA) sa pakikipag-partner sa financial technology (FinTech) sa pagsisikap na maisama ang teknolohiya sa pagkakaloob ng serbisyo at digitalize na transaksiyon sa lungsod.
Nagpahatid nang lubos na pasasalamat si Mayor Dale Gonzalo “Along” Malapitan sa GCash sa ipinagkaloob na parangal at tiniyak na magpapatuloy ang ganitong inisyatiba sa paggamit ng teknolohiya para sa kaginhawaan ng kanilang mamamayan.
“Malaking bagay po ito para sa atin dahil dito, nakikita natin na nasa tamang direksiyon ang ating mga programa, Mula nga po nang nakipagtulungan tayo sa GCash, mas napagsilbihan natin ang mga mamamayan lalo ang mga taxpayer at mga miyembro ng vulnerable sectors dahil hindi nila kailangan pang pumunta sa city hall at pumila para lang makapagbayad o matanggap ang benepisyong para sa kanila,” pahayag ni Mayor Along.
Sabi ng alkalde, malaking bagay ang magkaroon ng katuwang ang lokal na pamahalaan tulad ng GCash dahil ang kanilang programa at serbisyo ay mabilis at maayos na maipaaabot sa mga Batang Kankaloo.
Maraming residente ang natuwa, partikular ang mga benepisyaryo dahil mapapadali ang kanilang pagkuha ng ayuda. (VICK AQUINO)
