Ang Pag-IBIG at ang P6-B pamumuhunan

PADAYON
ni Teddy Brul

ISANG kolum ng pagsusuri at pananagutan

Ayon sa mga ulat at impormasyong lumabas sa publiko, muling napapagitna sa kontrobersiya ang isang ahensiya ng gobyerno—ang Pag-IBIG Fund—kaugnay ng isang pamumuhunang tinatayang umaabot sa ₱6 bilyon.

 Ang naturang pondo umano’y inilagak sa EEI Corporation, isang construction company na ilang taon nang humaharap sa paghina ng kita at mabigat na pagkakautang.

Ang Pag-IBIG Fund, na itinatag noong 1978 sa bisa ng Presidential Decree 1530, ay may mandatong pangalagaan ang ipon ng manggagawang Filipino at magbigay ng abot-kayang pabahay. Kaya’t anumang hakbang hinggil sa pamumuhunan ng pondo nito ay inaasahang dumaraan sa masusing pagsusuri at kolektibong pag-aproba.

Ano ang nauna?

Isang taon matapos maupo sa Malacañang si Ferdinand Romualdez Marcos, Jr., lumabas sa mga ulat na ang kanyang pinsan na si Martin Romualdez ay bumili ng halos 20 porsiyentong common shares ng EEI Corporation sa halagang ₱1.2 bilyon. Ang naturang hakbang ay naganap sa panahong ang kompanya ay sinasabing dumaranas na ng pagkalugi.

May mga nagsasabing posibleng inaasahan ni Romualdez na magiging bahagi ang EEI sa mga proyektong impraestruktura ng pamahalaan, gaya ng flood control. Gayunman, ayon sa mga ulat, hindi umano ito natuloy at kalaunan ay hinangad na ma-buy out ang kanyang puhunan.

Usapin ng impluwensiya

Dito na pumasok ang maselang bahagi ng usapin. Ang EEI Corporation, ayon sa mga financial disclosure, ay wala umanong sapat na pondo upang agad na bilhin pabalik ang mga naibentang shares. Sa ganitong konteksto, lumitaw ang alegasyon na ang Pag-IBIG Fund ay ‘nahimok’ na pumasok bilang investor.

Mahalagang idiin: si Martin Romualdez ay hindi lamang isang negosyante kundi noo’y Speaker ng Kamara ng mga Kinatawan, kaya’t hindi maiiwasang umalingawngaw ang tanong tungkol sa

impluwensiyang kaakibat ng posisyon.

Paano dumaan ang desisyon

Ayon sa mga ulat, ang plano ay dumaan umano sa isang kaalyado sa Kamara—isang party-list congressman na may kaugnayan sa pamilya ng asawa ni Romualdez na si Yedda Marie Mendoza-Romualdez. Ang naturang kahilingan ay naiugnay pa umano sa isang matataas na opisyal ng Pag-IBIG Fund na dati rin nagsilbing tagapagsalita ng naturang party-list.

Sa huli, lumabas sa mga ulat na ang kasunduan para sa ₱6 bilyong pamumuhunan—₱5 bilyon mula sa investible funds at ₱1 bilyon mula sa provident funds ng mga empleyado—ay nilagdaan ni Marilene Acosta, Pangulo at CEO ng Pag-IBIG Fund.

Ang kritikal na punto: may mga nagsasabing ito ay naganap nang walang malinaw na pag-aproba ng buong Board of Directors, bagay na mahalagang linawin dahil sa umiiral na mga patakaran sa pamamahala ng mga GOCC.

Kinalabasan ng pamumuhunan

Matapos pumasok ang malaking puhunan, naglabas ng dibidendo ang EEI Corporation noong Marso 2025, na nagdulot ng pansamantalang pagtaas ng presyo ng stocks nito. Sa mga sumunod na araw, ibinenta umano ni Martin Romualdez ang kanyang shares—mula sa ₱1.2 bilyon ay naging tinatayang ₱3.75 bilyon.

Pagkaraan nito, muling bumagsak ang halaga ng stocks ng EEI at hanggang sa kasalukuyan ay hindi pa ganap na nakababawi. Dahil dito, lumalakas ang pangamba na maaaring mahirapang mabawi ng Pag-IBIG Fund ang buong halaga ng ipinuhunan.

Mga naunang kaso, parehong tanong

Hindi ito ang unang pagkakataon na may opisyal ng gobyerno na nasangkot sa usapin ng pamumuhunan o transaksiyong umano’y lumagpas sa kapangyarihan ng

board.

Noong Mayo 2025, sinibak si Arnell Ignacio, dating administrador ng Overseas Workers Welfare Administration, kaugnay ng isang ₱1.4 bilyong land acquisition deal na sinasabing hindi dumaan sa Board of Trustees. Isinampa rin laban sa kanya ang reklamo sa Office of the Ombudsman.

Samantala, sinuspinde naman ng Ombudsman si Arnulfo Veloso, Pangulo at General Manager ng Government Service Insurance System, dahil sa ₱1.44 bilyong pamumuhunan sa Alternergy.

Panawagan ng pananagutan

Sa harap ng mga naunang desisyong ito, hindi maiiwasang itanong ng publiko:

Magkakaroon ba ng kaparehong antas ng pagsusuri at pananagutan sa usapin ng Pag-IBIG Fund at sa papel ni CEO Marilene Acosta sa kontrobersiyal na ₱6 bilyong pamumuhunan?

Sa huli, ang hinihingi ng sambayanan ay hindi haka-haka kundi linaw, pananagutan, at paggalang sa ipon ng manggagawang Filipino. Ang pondo ng bayan ay hindi laruan ng impluwensiya—ito ay pawis at pag-asa ng milyon-milyon.

Bantayan natin. Singilin natin. Ipaglaban natin ang pondo ng manggagawa.

Padayon!