PH tracksters Cesar, Loraña, winalis ang 800m para sa dalawang ginto

BANGKOK — Naghatid ng pambihirang tagumpay para sa Pilipinas ang SEA Games first-timer na si Naomi Marjorie Cesar sa athletics matapos masungkit ang gintong medalya sa isang kapana-panabik na photo finish sa 33rd Southeast Asian Games na ginanap sa Suphachalasai National Stadium.

Nagtala ang 16-anyos na si Cesar ng oras na 2:10.2 sa women’s 800-meter, tinalo ang Vietnam’s Thi Thu Ha Nguyen na nagtapos sa pilak matapos mag-oras ng 2:10.3.

Kinumpleto ng kapwa Pilipina na si Bernalyn Bejoy ang matagumpay na araw para sa mga Pilipino matapos masungkit ang bronze medal sa oras na 2:10.6.

“Napakaganda ng pakiramdam. Hindi na ako makahihiling pa ng mas magandang resulta at parang hindi pa rin ako makapaniwala, pero napakagaling,” pahayag ng 16-anyos na si Cesar, na nakababatang kapatid ng miyembro ng Philippine women’s football team na si Malea Cesar.

“Napakasarap sa pakiramdam. Karangalan para sa akin na katawanin ang bansa. Ang manalo ng ginto ay isang pangarap na natupad,” dagdag pa niya.

Kasabay niyang nagningning si Hussein Loraña, na nagtala ng oras na 1 minuto at 48.80 segundo upang masungkit ang gintong medalya sa men’s 800-meter, tinalo ang crowd favorite na si Joshua Robert Atkinson ng Thailand, na nagtapos sa pilak sa oras na 1:49.24.

Nakuha naman ni Wan Zahari Wan Muhammad Fazri ng Malaysia ang bronze medal matapos magtala ng 1:49.85.

“Sobrang unexpected po kasi kalaban ko ang pinakamabilis na runner sa Southeast Asia sa 800-meter at 400-meter. Sobrang hindi ko po inaasahan na mananalo ako sa event na ito,” pahayag ni Loraña. (POC Media Pool)