Jed Madela superhero sa mga bagong artist

SHOWBIZ KONEK
ni Maricris Valdez

FRESH, bumata, at bumagay ang bagong ayos o gupit ng buhok kay Jed Madela nang humarap ito sa Star Magic Spotlight presscon sa Coffee Project Will Tower kamakailan.

Panay nga ang puri namin noong hapong iyon kay Jed dahil nanibago kami sa kanya. Isang taon na rin kasi pala ang huli naming interbyu sa kanya para sa concert niya noong 2024. At ngayong 2025 muli namin siyang nakahutahan para sa kanyang Superhero concert sa July 5 sa Music Museum.

Ani Jed, isang gabing punompuno ng celebration at world-class na performances ang matutunghayan sa konsiyertong ito. Dagdag pa ang muling pagbabahagi ni Jed ng mga nangyari sa kanyang buhay for the past year at pasasalamat na rin sa mga suportang natatanggap niya.

“I learn the songs by heart. And now that we’re doing this full concert talaga, siyempre ‘yung endurance. I try to be more physically fit for the concert… even the production, I oversee everything.

“Normally, I do concerts every July kasi it’s my birthday month. Something I do to give back and to give thanks to the people who have been supportive.

“What makes this year’s different is that every concert is an opportunity for me na magkwento ng mga nangyari for the past year,” anang Kapamilya singer.

Bukod sa birthday concert, mayron din siyang show, ang Birmingham Barrio Fiesta sa July 13 sa Woodgate Valley Country Park. Susundan ito ng kanyang performance sa  Bravo Manila sa August 23 sa The Theatre at Solaire.

Ang Bravo Manila ay isang selebrasyon ng Filipino musical excellence at makakasama niya rito sina Bituin Escalante at  Sofronio Vasquez.

Bukod sa mga concert, isang album mula Star Music  din ang dapat abangan kay Jed na magtatampok ng mga bagong tunog at heartfelt na kanta na tiyak tatatak sa puso ng kanyang mga tagapakinig.

“What’s more important sa akin ngayon is ang laki pala ng impact ko sa tao. Lalong-lalo na sa mga bagong artist ngayon. It’s something I really want to pay forward,” wika pa ni Jed.

Ibinahagi rin ni Jed ang pagkahilig niya sa pagko-kolekta ng laruan. “I’m a toy collector. I’m also an art toy designer. I’m very active in the collectible industry. Kakatapos lang ng Toycon 2025 and I was part of it.

“The latest one that I released was ‘VuDU Boy’, a self character I created in 2009… eventually evolved from a sketch to an actual art toy,” masayang pagbabahagi pa ng singer.