HATAW! D'yaryo ng Bayan hatawtabloid.com
NAGDEKLARA ng matinding suporta si Chairman Emeritus Dr. Jose Antonio Goitia kasama ang kaniyang tatlong grupo ng makabayang Filipino sa pagpalag ni Department of National Defense (DND) Secretary Gilberto Teodoro sa mga tanong na ibinato ng dalawang mataas na opisyal ng militar ng China na maituturing na isang paraan ng pambu-bully sa isinagawang taunang security forum na ginanap sa Shangri-La hotel sa Singapore.
Ang deklarasyon ng pagsuporta ay ipinahayag sa pamumuno ni Chairman Emeritus Goitia kasama ang kaniyang libo-libong miyembro na kumakatawan sa mga grupo ng Alyansa ng Bantay Kapayapaan at Demokrasya (ABKD), Filipinos Do Not Yield (FDNY) Movement at People’s Alliance for Democracy and Reform (PADER) na matagal nang nagpapakita ng kanilang pagtutol sa mga agresibong pag-atake ng China sa Filipinas, maituturing na paglabag sa kasunduang naaayon sa pinirmahan sa United Nations Convention on the Law of the Sea (UNCLOS) noong 10 Disyembre 1982.
Ayon kay Chairman Emeritus Goitia, ang mga binitiwang tanong ng dalawang opisyal ng China ay isang bitag para kay Secretary Teodoro upang magbigay ng marahas na tugon sa maritime dispute sa West Philippine Sea (WPS).
Ani Goitia, hinangaan niya ang katapatan ni Secretary Teodoro sa pagtugon sa mga tanong ng dalawang military official ng China na pinalakpakan ng mga dumalo sa forum.
“Ang pagsagot ni Secretary Teodoro ay maituturing na isang hindi direktang pang-iinsulto na nagmula sa isang opisyal na may integridad,” saad ni Goitia.
Idinagdag ni Goitia, ang kanilang grupo ay sumusuporta sa pahayag ni Secretary Teodoro na bagamat ang Filipinas ay kabilang sa Association of Southeast Asian Nations (ASEAN) ito ay isang sovereign country na may sariling teritoryong may integridad at soberanya na nagrerespeto sa UNCLOS.
Idiniin ng Chairman Emeritus, sobra na ang paglapastangan at pambu-bully ng China sa ating karapatan base sa napakaraming napaulat na agresibong aksiyon ng Chinese Coast Guard laban sa mga barko ng Filipinas tulad ng water cannon blasting at laser targeting at maging sa mga mangingisdang Filipino na naghahanpbuhay sa karagatan ng Filipinas.
Upang ipakita ang kanilang pagkadesmaya sa ginagawa ng gobyerno ng China, pangungunahan ng PADER ang pagsusulong ng iba’t ibang uri ng mass actions sa Mendiola at maging sa harap ng Chinese Embassy sa Makati City samantala ang dalawang grupo ng ABKD at FDNY Movement ay magra-rally sa harap ng tanggapan ng (DND).
Matatandaang si Defense Secretary Teodoro ay dumalo sa isang forum na isinasagawa ng International Institute for Strategic Studies (IISS) na inorganisa ng IISS Singapore noong 1 Hunyo 2025. Isa itong taunang forum ng pagtitipon ng mga ministers of defense, matataas na pinuno ng militar at eksperto sa seguridad mula sa Asian-Pacific region upang talakayin ang mga hamon na kinakaharap ng mga bansa at upang magtatag ng kooperasyon sa paglutas ng mga kaguluhan. (BONG SON)
