HATAW! D'yaryo ng Bayan hatawtabloid.com
TINIYAK ni Pamilya Ko Partylist 1st Nominee Atty. Anel Diaz na wala silang babalikan ng utang na loob sa sandaling mabigyan sila ng pagkakataon ng taong bayan na makaupo sa Mababang Kapulungan ng Kongreso para maging kinatawan ng bawat pamilyang Filipino.
Ayon kay Diaz walang sinomang mataas na kilalang tao, politiko at mga negosyante ang nasa likod nila sa pagtakbo ngayong halalan.
Binigyang-linaw ni Diaz na tanging ang taong bayan lamang na sumusuporta at patuloy na naniniwala sa kanilang partido ang dapat nilang balikan ng utang na loob.
Aminado si Diaz na ang mainit na pagsalubong at suporta sa kanila ng taong bayan ang kanilang pinaghuhugutan ng loob kung kaya’t nanatili silang lumalaban hanggang iproklama ang nananalong mga kandidato sa halalan.
Sa ilang mga natitirang oras bago ang araw ng halalan ay hindi naman naitagong magpasalamat ni Diaz sa lahat ng kaniyang campaign team at maging sa taongbayan na siyang nagbibigay ng tunay na lakas at suporta.
Tiniyak ni Diaz na sa sandaling sila ay palarin na mabigyan ng pagkakataon sa Mababang Kapulungan ng Kongreso ay kanilang itutulak ang mga pangunahing batas na kanilang naipangako sa taongbayan.
Inamin ni Diaz, sa kanilang pag-iikot sa iba’t ibang bahagi ng bansa ay lubhang naipaliwanag na nila sa taongbayan kung ano at sino ang Pamilya Ko Partylist na dahilan upang sila ay pumasok sa mga naglalabasang survey.
