Sulong Malabon movement todo suporta sa kandidatura ni mayor Jaye Lacson-Noel at congressman Lenlen Oreta

TAHASANG nagpahayag ng suporta ang multi-sectoral movement na Sulong Malabon sa tambalan nina Congresswoman Jaye Lacson-Noel na tumatakbong mayor at dating Mayor Lenlen Oreta na ngayon naman ay tumatakbong congressman ng lungsod.

Sa pahayag ng nasabing grupo naniniwala sila na  ang pinagsamang liderato ng dalawang lider bilang mayor at congressman ang higit na makabubuti para sa kanilang mga Malabonian.

“Naninindigan kami dapat matuldukan na ang kawalang-direksiyon at plano ng kasalukuyang namumuno sa Malabon. Nasaan na ang P400 milyong inilaan at iniwan ng nakaraang administrasyon upang maisaayos ang Tugatog Cemetery? Matatapos na lang ang termino ng nakaupo ngayon pero halos wala pa rin nangyayari. Tuloy walang maayos na mapaglibingan ang mahihirap nating mga kababayan,” bahagi ng pahayag ng grupo.

Naniniwala ang grupo na marami iregularidad at kapalpakan na ginagawang  pantapal ang mga  ayuda mula sa ipinagmamalaking ‘blue card’.

Para sa grupo ay maituturing na tila ginagawang  manlilimos, patay-gutom, at kawawa ang mga mamamayan ng Malabon.

“Noong nakaraang taon ay hinanapan ng Commission on Audit (COA) ng P392 milyon ang lokal na pamahalaan at kamakailan lang may P37 milyong gastos na hindi maipaliwanag, nagdurusa kaming mga taga-Malabon. Daan-daang milyon na ang nasasayang mula sa kaban ng ating lokal na pamahalaan dahil sa kapabayaan at kawalan ng mahusay na pamumuno,” dagdag ng grupo.

Binigyang-diin ng Sulong Malabon na mataas ang respeto at paniniwala nila sa dalawa dahil alam nilang lubos na nagmamahal sa Malabon kaya’t hinimok nila ang mga kapwa Malabonian na bumoto nang tama para sa kanilang mga pamilya at para sa kinabukasan ng susunod na henerasyon.