HATAW! D'yaryo ng Bayan hatawtabloid.com
SINAMPAHAN ng reklamo sa Commission on Elections (Comelec) ang mag-asawang sina Malabon City Mayor Jeannie Sandoval at former congressman Ricky Sandoval kasunod ang pangangampanya nito kahit Good Friday sa kalagitnaan ng prusisyon sa Barangay Dampalit.
Sa reklamong inihain ni Darren David, taxpayer at lehitimong residente sa Malabon, noong Biyernes Santo, 18 Abril, mismong sina Mayor Sandoval at ang mister nitong si Ricky ang namimigay ng mga campaign leaflets at iba pang materyales sa pangangampanya habang nagaganap ang prusisyon sa barangay.
Sa personal na paghahain ng reklamo ni David sa punong tanggapan ng Comelec sa Intramuros, sinabi niyang nilabag ng mag-asawang kandidato ang Section 5 (b) ng Republic Act 7166 at Comelec Resolution No. 11086 na mahigpit nagbabawal sa pangangampanya sa panahon ng Semana Santa, partikular ang Maundy Thursday at Good Friday.
Si Mayor Sandoval ay kumakandidato para sa reeleksiyon ng pagkaalkalde samanta si Ricky ay tumatakbo para sa pagka-kongresista ng lungsod.
Kaugnay nito, hiniling ng petitioner sa Comelec na aksiyonan ang paglabag ng mag-asawa sa pamamagitan ng deskalipikasyon upang maipakita sa mga mamamayan na walang mas nakatataas sa mga batas na umiiral sa bansa. (HNT)
