HATAW! D'yaryo ng Bayan hatawtabloid.com
MATABIL
ni John Fontanilla
MAY bagong awitin na handog para sa kanyang mga supporter ang Pinoy Alternative Rock Singer-Songwriter at GMA Kapuso Artist na si Nadj Zablan, ito ang Laya.
Ayon kay Nadj, “Ang ‘Laya’ ay isang awiting bagama’t rock ang tema, ay may nakaiindak na tiyempo. Na sa unang mga linya ay maiisip ng lahat na ang kantang ito ay sakto para sa summer.”
Pero Ang awiting Laya ni Nadj ay inspired sa naganap na pandemya na sa wakas ay puwede nating sabihin na tayo’y nakalaya na, na dahilan para tayo’y magpasalamat at magsaya sa maituturing nating panibagong buhay.
At dahil sa magandang melody nito marami ang napapaindak.
Hit na rin ngang maituturing ang dance steps nito na sinasayaw ng ilang Kapuso personalities at Baranggay LSFM DJ tulad nina Papa Ace, Papa Ding, Papa Yohan, at Janna Chu Chu na naka-upload na sa social media account like Facebook, Tiktok atbp. ni Nadj.
Si Nadj ay unang nakilala sa mga awiting panghugot gaya ng Sabihin, Hanggang Kailan, at Luha na naging Most Wanted Songs ng Barangay LS 97.1. Lalong nag-umigting ang pagkilala sa kanya nang nailabas ang awitin niyang Akay na siya ay dahan- dahang bumabalik sa kanyang Alternative Rock genre.
Nanggaling din ito sa pagbabanda, ang Silangan (na kilala noon sa kanyang homebase sa Antipolo), at Treadstone na naging Metro Manila Champion ng Red Horse Muziklaban 2006.
At ngayong 2025 sa kanyang awiting Laya ay naisip ni Nadj na napapanahon na para magbigay ng lubos na kasiyahan sa pamamagitan ng pag-indak at pagbahagi ng good vibes sa mga nakikinig. Sa gitna ng mga sakuna at pagsubok sa ating buhay, nais ni Nadj na magbigay ng pag-asa at saya sa kanyang mga tagahanga.
Ang mga Pinoy Rock Icon na sina Bamboo Manalac, Rico Blanco, at Ney Dimaculangan ang influences ni Nadj sa pagbuo ng mga kanta.
Ang Laya ay available na for streaming and download sa Spotify, Apple Music, YouTube Music at sa iba pang digital Music Platforms worldwide. Maaari na rin itong i-request sa Barangay LS 97.1 Forever!
