HATAW! D'yaryo ng Bayan hatawtabloid.com
PERSONAL na naipaabot ni Anne Curtis (matapos magpahayag sa X, dating Twitter), ang pagsuporta kay dating Senador at independent senatorial candidate, Bam Aquino nang bigla silang magkita sa Ninoy Aquino International Airport Terminal 2.
Sa ‘di-inaasahang pagtatagpo, muling pinagtibay ni Anne ang suporta sa kandidatura ni Aquino at sa kanyang mga adhikain, partikular ang Free College Law. Nagpakuha pa ng larawan si Anne kasama si Aquino habang naka-No. 5 sign, bilang pagpapatibay ng kanyang pag-endoso sa senador.
Ibinahagi rin ni Anne ang kanilang larawan sa kanyang Instagram bilang parte ng kanyang “So MARCH fun” carousel album, na may caption na, “bumped into someone I’m voting for!”
Ito ang ikatlong pagkakataon na hayagang nagsabi ng suporta ang aktres sa kandidatura ni Aquino. Una niya itong ginawa ng sumagot siya ng “Yes!!” sa tweet ng stand-up comedian na si Alex Calleja na humihimok sa mga botante na isama si Aquino sa kanilang listahan ng mga iboboto sa darating na halalan.
Pinagtibay pa ni Anne ang pag-endoso nang i-retweet niya ang post ni Aquino sa X tungkol sa kanyang hangaring mapaunlad ang buhay at mabigyan ng mas maraming oportunidad ang pamilyang Filipino.
Sa isang Facebook post, pinasalamatan ni Aquino si Anne sa kanyang patuloy na pagsuporta. “Masaya akong nakasalubong at nakakuwentuhan ka ng saglit sa airport habang papunta sa kanya-kanyang mga flight natin! Your support means a lot to us at sa ipinaglalaban natin sa ating kampanya.
“Ipapanalo natin ang laban na ito para sa madlang pipol at sa bawat pamilyang Pilipino! Libreng Kolehiyo, Siguradong Trabaho! God bless you, Anne!” dagdag pa niya.
Bukod kay Anne, ilan pang kilalang personalidad ang nagpahayag ng suporta kay Aquino, kabilang sina Edu Manzano, Dingdong Dantes, rapper/actor/director/vlogger Pio Balbuena, Bea Binene, Janine Gutierrez, at talent manager, aktor, at entertainment reporter na si Ogie Diaz. (MVN)
