HATAW! D'yaryo ng Bayan hatawtabloid.com
SINIPAT ng TRABAHO Partylist sa Navotas City ang kondisyon ng mga nagtatrabaho sa mga latahan ng sardinas, planta ng corned beef, hayumahan ng lambat, at varadero [shipyards] na ang mayorya ng mga manggagawa ay “skilled workers” at “seasonal employees”.
Sa isang dialogo nitong 24 Marso 2025 sa pagitan ng TRABAHO at mga nasabing mangaggawa, ibinida ni Atty. Johanne Bautista ang kanilang prayoridad na mabigyan ng libreng upskilling and reskilling programs para sa mga skilled workers.
“Para po sa industriya natin [food at shipbuilding], isa po sa aming mga isinusulong ang free skills training,” aniya.
Para naman sa mga seasonal employees, aaksiyonan ng grupo ang kawalan ng kita o hanapbuhay tuwing off-season.
“Dapat po tulungan natin itong mga manggagawa na nawawalan ng trabaho during off-season, kaya ang isa po sa aming mga isinusulong na programa ay ang pagbibigay po ng alternative na sources of income sa pamamagitan po ng job placement services at livelihood programs,” pagbibigay-diin ng abogadong nominee.
Ang mga ito ay mga aksiyon sa mas malawak na labor reforms na isinusulong ng TRABAHO, numero 106 sa balota, gaya ng mas mataas na sahod, karagdagang mga benepisyo, at patas na oportunidad sa trabaho.
