HATAW! D'yaryo ng Bayan hatawtabloid.com
WALANG inutang ang pamahalaang Maynila sa pagpapatayo ng bago at modernong public market sa Tondo.
Ito ang ipinahayag ni Mayor Maris Sheilah “Honey” Lacuna-Pangan matapos nang pangunahan ang groundbreaking para sa itinatayong Pritil Public Market na inaasahang matatapos ang konstruksiyon sa Oktubre 2026.
Ang bagong public market ay may sukat na 11,930 square meter floor area, may budget na P283.63 milyon. Ito ay may 388 dry stalls, 281 wet stalls, dry storage and ice storage, parking area, roof deck para sa 114 cars at motorcyles, all gender and PWD public toilets, male public toilets, PWD access ramps, sewage treatment, plant and waste facility storage. Mayroon din itong underground cistern para sa pagpigil ng baha habang ang tanggapan nito ay ilalagay sa roofdeck.
Binigyang diin ni Lacuna na ang pondo sa pagpapatayo ng Phase I ng infrastructure project ay nagmula sa city’s special purpose appropriations para sa 2025 at walang inutang ang pamahalaang lungsod.
“This is the result of our administration’s award winning good financial housekeeping which we earned for three straight years,” pahayag ni Lacuna.
Tiniyak ni Lacuna na gagawing affordable at rasonable ang upa sa mga puwesto para maialok ng mga vendors ang kanilang mga paninda sa murang halaga at ang occupancy rates para sa mga stalls at cold storage ay hindi magastos.
Nais ng Lungsod ng Maynila na makapaglingkod sa mga residente ng Tondo bilang kapalit ng nasunog na palengke noong 2023 na naging dahilan upang mawalan ng puwesto ang mga vendors. (BONG SON)
