HATAW! D'yaryo ng Bayan hatawtabloid.com
NAGPAHAYAG ng suporta ang TRABAHO Partylist, bilang 106 sa balota, sa pagtutok ng pamahalaan sa pagpapabuti ng public transportation system upang mapabuti ang pang-araw-araw na biyahe ng milyon-milyong Filipino.
Sa isang press briefing sa Malacañang nitong nakaraang linggo, inilatag ng administrasyon ang kanilang mga plano sa pagpapalawak at pagsasaayos ng sistema ng transportasyon sa bansa, na may layuning gawing mas mabilis, abot-kaya, at accessible ang pampublikong transportasyon.
Ipinahayag ng TRABAHO Partylist ang kanilang papuri sa hakbang na ito, na nakikitang may malaking epekto sa trabaho at ekonomiya.
Ayon kay Atty. Mitchell-David L. Espiritu, tagapagsalita ng TRABAHO Partylist, malaki ang benepisyong hatid ng maayos na transportasyon sa mga manggagawa.
“Napakahalaga ng efficient at abot-kayang transportasyon para sa accessibility ng trabaho. Maraming manggagawa ang nahihirapan sa mahaba at magastos na biyahe, na bumabawas sa kanilang produktibidad at naglilimita sa kanilang pagpipiliang trabaho. Malulutas ito ng mga proyektong pang-transportasyon ng gobyerno,” ani Atty. Espiritu.
Bukod sa job generation, tiniyak ng TRABAHO na ang mga proyektong ito ay magdadala ng benepisyo sa lahat ng sektor ng lipunan. Isinusulong ng partylist ang patas na oportunidad sa trabaho at pagkakakitaan, kabilang ang ligtas at inklusibong transportasyon para sa mga may kapansanan (PWDs), kababaihan, at mga marginalized na komunidad.
“Ang isang modernong sistema ng transportasyon ay hindi lang dapat efficient, kundi inklusibo rin. Sisiguraduhin naming may mga polisiya na nagpoprotekta sa karapatan at kapakanan ng lahat ng commuter,” dagdag ni Atty. Espiritu.
