HATAW! D'yaryo ng Bayan hatawtabloid.com
PATULOY na tumataas ang kasikatan sa mga botanteng Filipino ng FPJ Panday Bayanihan partylist nang
pumasok sa Top 5 at makuha ang ikaapat na puwesto mula sa 156 partylists, na magtutunggali sa 2025 midterm election 2025, batay sa pinakabagong survey ng OCTA Research.
Ayon sa pinakabagong Tugon ng Masa survey ng OCTA Research, nakakuha ang ACT-CIS Partylist ng 6.46% ng mga boto mula sa mga sumagot sa survey, sinundan ng 4PS partylist na may 5.62% boto sa pangalawang puwesto.
Ang Duterte Youth Partylist ay pumangatlo na may 3.95% boto at ang FPJ Panday Bayanihan partylist ay nakakuha ng 3.84% boto.
Ang fieldwork ng survey ay isinagawa ng OCTA research team mula 25 Enero hanggang 31 Enero 2025, gamit ang harapang panayam sa 1,200 respondents sa buong bansa.
Ayon kay Brian Poe Llamanzares, unang nominado ng FPJ Panday Bayanihan partylist, ikinalulugod nila ang makabuluhang pagtaas sa puwesto ng partido sa pagkamit nito ng 3.84% boto, isang matinding pagtaas mula sa mas mababa sa 2% survey ng OCTA research noong Disyembre ng nakaraang taon.
Sa pagtaya ang FPJ Panday Bayanihan partylist at Duterte youth ay maaaring manalo nang hindi bababa sa dalawang upuan sa Kongreso ang bawat isa sa kanila, ayon sa pag-aaral, habang ang nangungunang dalawang grupo ay inaasahang makakokopo ng tatlong upuan sa Kamara.
Mababatid na ang FPJ Panday Bayanihan ang tanging grupo na walang kasalukuyang kinatawan sa kongreso, na nagpapakita ng kanilang matibay na suporta mula sa masa.
“Kami ay talagang nagpapasalamat sa aming mga kapwa Filipino para sa kanilang napakalaking suporta,” sabi ni Poe.
“Ang kinalabasan ng survey na ito ay nagpapalakas ng aming determinasyon na ipatupad ang mahahalagang reporma na magpapabuti sa buhay ng mga pinakanangangailangan. Ang pagkain, pag-unlad, at katarungan ay mananatiling aming pangunahing prayoridad sa ilalim ng aming plataporma at mga konsultasyong sektoral,” dagdag niya.
