HATAW! D'yaryo ng Bayan hatawtabloid.com
INULAN ng batikos sina dating Taguig Mayor Lino Cayetano at kanyang asawa, si Fille Cainglet-Cayetano, nang gawing entablado ng politika ang sagradong tradisyon ng Pagoda sa Daan para kay Santa Marta.
Sa isang pahayag sa kanilang Facebook page, isang grupo ng mga deboto ang mariing kinondena ang tahasang paggamit ng relihiyosong okasyon upang isulong ang kandidatura ni Lino Cayetano.
“Kami, bilang mga nagkakaisang mamamayan at deboto ni Santa Marta, ay mariing kinokondena ang ginawang paggamit sa Pagoda sa Daan ng Pateros bilang kampanya para kay Lino Cayetano.”
Ayon sa mga deboto, desmayado sila sa pagpapahintulot ng JCI at ng Simbahang Katoliko sa anila’y ‘pagsalaula’ sa kanilang taunang debosyon.
“Imbes pagtuunan ng pansin ang pananampalataya, ginamit ito sa politika,” anila.
Lalo pang ikinagalit ng grupo ang umano’y pamimigay ng mga plakard sa mga kabataan at ang pag-uudyok sa kanila na isigaw ang pangalan ni Lino habang isinasagawa ang prusisyon.
“Isang malinaw na pambabastos ito hindi lamang sa aming pananampalataya kundi maging sa mismong diwa ng Pagoda sa Daan. Sa kauna-unahang pagkakataon sa kasaysayan ng Pateros, nagkaroon ng ganitong uri ng pagkilos!” ayon sa grupo.
Dahil dito, nananawagan sila sa lahat ng may kinalaman sa nasabing pangyayari na itama ang nagawang paglapastangan sa sagradong tradisyon.
Sang-ayon naman ang mga netizens sa grupo ng mga deboto:
Sabi ni Tricing Alindong: “Hindi tama ang paggamit ng relihiyosong okasyon para sa kampanya. Respeto naman sa pananampalataya ng iba.”
“Nakagagalit na pati ang mga kabataan ay ginamit para sa political agenda. Saan na ang delicadeza?” tanong ni Erik Garciano.
“Ang Pagoda ay para sa debosyon, hindi para sa politika. Nakababahala ang ganitong mga gawain,” dagdag ni Miko Lastimosa.
Nitong nakaraang taon, nasangkot din sa kontrobersiya si Lino Cayetano matapos kumalat ang kanyang mga tarpaulin na may nakasulat na “LABAN LINO,” na nakitang nakapaskil sa mga puno at malilinis na pader sa iba’t ibang barangay ng Taguig. Ang ganitong gawain ay tahasang paglabag sa Republic Act No. 3571, na nagbabawal sa pagsira o pagsasagawa ng aktibidad na maaaring makapinsala sa mga puno sa pampublikong lugar.
Mariing kinondena ito ng mga netizens at environmental groups, kabilang ang EcoWaste Coalition, na nanawagan sa mga kandidato na huwag gawing kasangkapan ang kalikasan sa pangangampanya.
Ayon sa grupo, hindi lamang ito nakasisira sa mga puno kundi nagdudulot din ng matinding basura sa lansangan.
Matatandaan na nitong Oktubre 2024, ibinasura ng Election Registration Board (ERB) ng Comelec-Taguig City ang kahilingan nina Lino at Fille Cayetano na ilipat ang kanilang voter registration mula Ikalawang Distrito patungo sa Unang Distrito ng Taguig-Pateros.
Sa 24-pahinang resolusyon ng ERB, hindi nakapagbigay ang mag-asawa ng sapat na ebidensiya upang patunayan ang kanilang paninirahan sa Pacific Residences, Brgy. Ususan. Dahil dito, nananatili ang kanilang rehistrasyon sa Brgy. Fort Bonifacio, kung saan sila bumoto noong 2023 Barangay at SK elections.
