Nadine unfair awayin sa ineendosong produkto

HATAWAN
ni Ed de Leon

HINDI maganda ang feedback kay Nadine Lustre na nag-promote ng on line gaming sa internet. Hindi nga siguro maganda iyon dahil parang hinihikayat pa niya ang mga taong magsugal, pero unfair namang awayin nila si Nadine dahil doon. Hindi naman kilalang sugarol si Nadine. 

Hindi naman siya kagaya ng iba na nagbababad sa casino, naglalasing at nakatutulog na sa pagsusugal. Tiyak iyon hindi naman si Nadine ang nakipag-deal sa endorsement na iyon kundi ang kanyang management company.

Karaniwan naman hindi na mga artista ang gumagawa niyan kundi ang mga manager nila. Siguro sa judgement ng managers niya ay walang masama roon kaya ipinagawa sa kanya.

Kaya iyang mga ganyang bagay, hindi dapat na artista agad ang sisisihin, dahil ang gumagawa naman ng ganyang desisyon ay ang mga talent manager. Kung si Nadine lang hindi naman siya mag-eendoso ng sugal.