HATAW! D'yaryo ng Bayan hatawtabloid.com
SHOWBIZ KONEK
ni Maricris Valdez Nicasio
MULING naka-iskor si Cedrick Juan dahil tinatangkilik ang family drama na kina-aaniban niya. Ang tinutukoy namin ay ang Ang Himala ni Niño sa TV5 na talaga namang kuhang-kuha ng kuwento ang puso ng mga manonood, lalo na dahil sa husay ng batang bida nitong si Zion Cruz.
Inaabangan ang pagpasok ng award-winning actor na si Cedrick sa susunod na linggo. Kaya naman tiyak na magdadala ng panibagong emosyon at excitement ang tambalan nina Cedrick at Zion sa seryeng sinusubaybayan ng maraming manonood araw-araw.
Si Zion ay isang homegrown talent ng MQuest Artist Agency (MQAA) na gumaganap bilang si Niño. Sa kabila ng batang edad, mahusay siyang nakikipagsabayan sa mga magagaling na artistang kasama niya sa serye.
Sa pagpasok naman sa serye ng multi-awarded Best Actor na si Cedrick bilang Kuya Victor, bibigyang buhay niya ang karakter na magkakaroon ng impluwensiya sa mga taong nakapaligid sa kanya. Kilala sa kanyang mga critically acclaimed roles, inaasahan ang mahusay na pagganap ni Cedrick sa mga eksenang tatatak sa puso ng mga manonood.
Kasama rin sa Ang Himala Ni Niño ang mga batang artistang sina Ryrie Sophia bilang Kring-Kring, Kenneth Mendoza bilang Butchoy, at Achilles Ador bilang Joco. Sila ang mga bagong talents ng TV5 na nagbibigay saya at puso sa kuwento.
Abangan din sa mga darating na linggo ang pagharap ni Niño sa mabigat na pagsubok ng pag-iwan sa kanya ng ina. Dahil dito, ang samahan nila Kring-Kring, Butchoy, at Joco ay magiging mas matibay at magdadala ng pag-asa at suporta kay Niño. Ang kanilang pagkakaibigan ay maghahatid ng mas malalim pang emosyon sa kuwento ng serye. Sa gabay ng mga seasoned actors tulad nina K Brosas at Freddie Webb, mas nahuhubog pa ang mga batang ito bilang magagaling na artista ng bagong henerasyon.
Huwag palampasin ang pagdating ni Cedrick sa Ang Himala ni Niño, mapapanood Lunes hanggang Biyernes, 11:15 a.m. sa TV5. Abangan ang kahanga-hangang kuwentong ito at ang mahusay na pagganap ni Zion.
