Sandro sa paulit-ulit na pang-aabuso sa kanya — halos maputol na ang private parts ko

HATAWAN
ni Ed de Leon

MAY isang source na nagsabi na nakita raw niya ang pagsasagawa ng physical examination kay Sandro Muhlach at totoong may palatandaan na siya ay posibleng paulit-ulit ngang inabuso ng dalawang suspects. Sinabi rin naman ni Sandro na halinhinan siyang inabuso ng dalawa sa buong magdamag.

May mga pahiwatig naman ang dalawa na akala raw nila ay ok lang, ibig sabihin payag naman si Sandro sa kanilang ginawa. Nang malaunan ang statement nila ay wala silang ginawa kay Sandro sa kabila ng lahat ng ebidensiya at iginigiit nilang nagkuwentuhan lamang sila sa buong panahon na ang batang aktor ay nasa kanilang kuwarto sa hotel.

May mga source ring nagsabi ayon kay Senador Jinggoy Estrada na hindi lamang si Sandro kundi nag-text din daw si Jojo Nones sa iba pang mga artista pero si Sandro nga lang ang nakumbinsi nilang magpunta sa kanilang hotel. SInabihan pa umano ni Nones si Sandro na, “kung ano man ang nangyari ngayon sa hotel ay hindi na dapat pang lumabas dito.”

Binura rin daw ni Nones ang lahat ng mga text niya sa cell phone maliban sa isa, na sinabi ni Sandro na dadaan siya saglit, bilang patunay na nagtungo roon si Sandro nang hindi nila pinilit. Gayunman, makikita sa record ng telco ang kompletong pagpapalitan nila ng text kaya nasabi ni Sandro na dadaan siya saglit. Bukod sa sexual harassment, may sinasabi pang kaso ng droga dahil pinasinghot nila si Sandro ng kung anong substance kahit na ayaw niyong bata na naging dahilan kung bakit tila namanhid ang buo niyong katawan at hindi na nakalaban nang sinimulang abusuhin. Hinubaran daw ni Cruz si Sandro at doon na nagsimula ang lahat.

Ang sabi pa ni Sandro, “halos maputol na ang private parts ko dahil sa paulit-ulit nilang abuso.”