HATAW! D'yaryo ng Bayan hatawtabloid.com
LALONG PINALAKAS ng Pasay city government ang inisyatibang palawakin at seryosohin ang pangangalaga sa kapakanan ng mga kabataang Pasayeño.
Kahapon, 15 Hulyo 2024, lumagda sa isang memorandum of understanding (MOU) sina Pasay City Mayor Imelda Calixto Rubiano at Council for the Welfare of Children (CWC) Undersecretary Angelo Tapales upang isulong ang Makabata Helpline 1383 na layong protektahan ang mga kabataan mula sa iba’t ibang uri ng karahasan at panganib.
Sa ilalim ng MOU, nagkasundo ang Pasay LGU at CWC na ipalaganap ang Makabata Helpline 1383 upang magamit sa pagtanggap ng ulat, reklamo, at impormasyon at bumuo ng kolektibong responsibilidad upang protektahan ang karapatan at kapakanan ng mga bata sa Pasay.
Nanguna sa signing ceremony si Mayor Emi at ang Pasay Social Welfare and Development Department, at si Usec. Tapales bilang kinatawan ng CWC.
Napagkasunduan sa MOU ang pagbalangkas ng mas ligtas at mapagkalingang kapaligiran na ang bawat bata sa Pasay ay maaaring umunlad at maabot ang kanilang buong potensiyal na maging bahagi ng pamayanan.
Ayon kay Mayor Emi, ang inisyatibang ito ay isang kolektibong responsibilidad ng lokal, nasyonal, at sibikong mamamayan upang mapalakas ang pagbibigay ng pangunahing serbisyo at suportang pangkalusugan sa mga kabataan at sa kanilang pamilya.
Kasabay nito, tiniyak ng punong lungsod na isasakatuparan sa ilalim ng kanyang pamumuno ang inisyatibong makalikha ng pangmatagalang proyekto para sa kagalingan at mapayapang kinabukasan ng susunod na henerasyon ng mga kabataan sa lungsod ng Pasay. (EJ DREW)
