HATAW! D'yaryo ng Bayan hatawtabloid.com
ni Ed de Leon
SABI na sa inyo eh huwag kayong magpapaniwala agad sa mga nakikita ninyo at nababasa sa internet. Minsan matatawa ka sa mga blogger, ang dami-dami nang nasabi pero hindi pa mabanggit ang pangalan ng ibinabalita nilang stars, kasi kung sasabihin nila agad kung sino at hindi naman pala sikat iyon, hindi na tatapusing panoorin ang kanilang video, paano naman sila kikita?
Ang mas nakatatawa pa iyong pagbanat ng isang blogger sa isang baguhang artista. Hindi namin malaman kung bakit ganoon na lang ang galit niya sa baguhan. Later on kaya pala siya galit ay hindi siya binayaran niyon para sa mga ginawa niyang blogs pabor doon. Eh ano ba naman ang aasahan niya, hindi pa naman sikat ang artista, at ang nilabasan lang naman ay isang show sa isang baryo sa Laguna eh magkano lang ang bayad, tapos ibibigay pa niya sa blogger?
Sana maging reasonable naman sila.
Mayroon pang isang kuwento, talagang pinipilit daw ng isang blogger ang isang male star na magpakuha sa kanya ng picture na nakasuot lamang ng briefs.
Ang sabi pa daw ng blogger, ibaba lamang niya ang kanyang pantalon ok na, pero hindi pumayag ang male star na ang feeling ay binabastos ang kanyang pagkatao.
Nagalit daw ang blogger at nagbantang iba-blog ang male star na naging kabit na ng maraming bakla.
Tama ba iyon?
