HATAW! D'yaryo ng Bayan hatawtabloid.com
HATAWAN
ni Ed de Leon
ABA nakailang screening na sa mga sinehan sa iba’t ibang lunsod sa Japan ang When I Met You in Tokyo at gustong-gusto iyon ng mga OFW na karamihan ay nagsasabing parang true to life story iyon. Karamihan sa kanila ay nagkakakilala at dahil sa pangungulila sa kanilang pamilya ay nagiging masyado na nga silang malapit na nauuwi naman sa relasyon.
“Common story iyan dito sa Japan,” sabi ng ilang OFW. Kaya nga maraming OFW ang nakare-relate. “At hindi lang dito sa Japan nangyayari ang ganyan kahit na sa ibang lugar na maraming OFWs,” sabi pa nila.
Hindi natin alam kung saan-saan pang parte ng Japan mag-iikot ang pelikula. Hindi na raw iyan kasama sa mga blocked screening na napagkasunduan noong una pa, mga OFW na mismo ang gumagawa ng blocked screenings para mapanood nila ang pelikula. Nakatutuwa naman at malaki ang kinikita ng pelikula kahit na sa abroad. Kung ganyan lagi may pag-asa ang mga pelikulang Filipino na makapasok na sa theatrical commercial exhibition sa mga sinehan sa abroad. Tanggap pala tayo hindi lang ng mga Pinoy kundi ng mga dayuhan din.
Tapos nasasabayan pa ng kampanya ni Vilma Santos na pabalikin ang mga tao sa sinehan, mukhang mabubuhay na nga yata ang industriya ng pelikulang Filipino.
