HATAW! D'yaryo ng Bayan hatawtabloid.com
HATAWAN
ni Ed de Leon
UNFAIR naman iyang sinasabing sana tuluyan nang magkahiwalay sina Barbie Forteza at Jak Roberto. Sa totoo lang, sila ang totoong magsyota noon pa man at ang pagiging magsyota nila ay hindi dahil isa iyong career move. Niligawan ni Jak si Barbie hindi dahil magagamit niya iyon para sumikat siya. In fact hindi nga nagpipilit si Jak na siya ang makatambal ni Barbie. Sa kanila iba ang personal na buhay at ang career.
Kung iisipin, pinagbigyan na nga sila ni Jak nang pagsabihan siya ng network na huwag munang masyadong maging visible na kasama si Barbie dahil may gagawin nga silang pakulo at iti-team siya kay David Licauco. Pumayag si Jak, ngayon gusto pa nila tuluyang hiwalayan iyon ni Barbie.
Ewan naman kung gagawin iyon ni Barbie dahil ang kanilang relasyon ni Jak ay personal. Iyong relasyon naman nila ni David simply professional, iniaarte lamang nila iyon. Iyon ba ang kanyang pipiliin?
In the first place, bakit si Jak ang kanilang pinag-iinitan. Bakit hindi rin nila masabihan si David na hiwalayan na ang tunay na girlfriend niyon? Dahil ba sa tingin nila mas madaling gipitin si Jak?
Mali ang fans na ganyan ang kaisipan. Kayo ay fans lamang ng mga artista at ang kailangan ninyong hangaan ay ang kanilang kakayahan sa pag-arte. Hindi ninyo dapat pinakikialaman ang personal nilang buhay. Bakit kaya ba ninyong tanungin ang mga artista sa araw-araw kung ano ang kanilang ulam sa kanilang bahay, at kung matanong man ninyo, may karapatan ba kayong panghimasukan ang kanilang kinakain? Eh ‘di lalo na sa pag-ibig masyadong personal na iyan para panghimasukan pa ng fans, o kahit na ng networks mismo. Abuso na iyan.
