HATAW! D'yaryo ng Bayan hatawtabloid.com
HATAWAN
ni Ed de Leon
IKINATUTUWA rin naman ni Vilma Santos na ang kanyang come back movie na When I Met you in Tokyo ay patuloy na ipinalalabas sa iba’t ibang lugar sa US.Hindi naman pumasok iyon sa commercial theater circuits sa Amerika, pero may mga ginaganap na special screening sa iba’t ibang lugar na hinihiling ng mga Pinoy na mapanood ang pelikula. Hindi lang mga Pinoy dahil kung sila lang ang manonood mapupuno ba nila ang sinehan? May mga Kano ring nanood ng pelikula bagama’t iyon ay hindi pa naman dubbed in Engish at wala ring subtitles man lang na Ingles.
Kung ano ang napanood natin dito noong Metro Manila Film Festival (MMFF) ganoon din ang ipinalabas sa US. Ang akala nila mailalabas lamang ang pelikula roon sa Manila International Film Festival (MIFF) na lahat din ng sampung entries sa MMFF ay kasali. Pero hindi ganoon ang nangyari sa pelikula ni Ate Vi dahil maraming fans na nasa malalayong lugar naman at hindi nakapunta noon sa LA na ipinalabas ang kanyang pelikula kaya inilabas na rin nila iyon sa ibang states na may mga Filipino namang tumayong organizer ng special screenings. Kaya nga tiniyak ng producers ng pelikula na kumita sila hindi lang sa PIlipinas kundi maging sa abroad, kaya lang sumunod sila sa MMFF Guidelines na hindi dapat ilabas ang kanilang actual gross. Ginagawa naman iyan ng MMFF para bigyang proteksiyon ang ibang pelikulang hindi gaanong kumita. Nagpapalabas lang sila ng rankings at hindi ng actual gross.
At least hindi lang dito sa Pilipinas tinatangkilik ang pelikula ni Ate Vi kundi maging sa abroad. Nagpapatuloy din ang pag-ikot ng pelikula sa iba’t ibang bansa sa Europe at sa Spain.
At least magandang balita iyan para sa mga Vilmanian. Malungkot kung ang mababalitaan mo ay may pelikulang natapos ang idol mo pero hindi maipalabas dahil tinatanggihan na ng mga sinehan.
