LA Santos nakipagsabayan ng aktingan kina Maricel at Roderick 

MATABIL
ni John Fontanilla

MULA sa pagiging awardwinning singer, ‘di rin matatawaran ang husay sa pag-arte ni LA Santos na pinabilib at pinaiyak kaming nanood ng teaser ng pelikulang In His Mother’s Eyes na hatid ng 7K Entertainment.

At kahit nga baguhan sa pag-arte ay hindi ito nagpakabog at nakipagtagisan ng galing sa pag-arte with Diamond Star Maricel Soriano at Roderick Paulate na sobrang husay din sa pelikula.

Napakaganda ng pagkakasulat ng story ng award-winning screenwriters, Gina Marisa Tagasa and Jerry Gracio, at napakahusay ng direksiyon ni FM Reyes na first time na nagdirehe ng pelikula.

Nawa’y makapasok ito sa last  four na pelikulang pagpipilian para makompleto ang top 8 entries para sa 2023 Metro Manila Film Festival dahil napakaganda at tiyak maraming Filipino ang makare-relate at maraming matututunang aral.

Ilan pa sa makakasama nina LA, Maricel, at Roderick sa In His Mother’s Eyes sina 

Ogie Diaz, Vivoree Esclito, Elyson De Dios, Reign Parani, at Maila Gumila.

Ang In His Mother’s Eyes ay hatid ng 7K Entertainment na ang executive producer ay si Mommy Florita Santos.