HATAW! D'yaryo ng Bayan hatawtabloid.com
HATAWAN
ni Ed de Leon
MUKHANG totoo nga yata ang kasabihan ng mga matatanda sa Santa Ana na naririnig namin noong bata pa kami. Ang sinasabi nila, “ang sino mang may debosyon sa Ina ng Walang Mag ampon, pumanaw man ay mananatiling buhay sa isip at alaala ng lahat, dahil siya ay deboto ng mapag-ampong birhen.”
Iyan ang nakikita naming nangyayari ngayon sa aming kabayang si Mike Enriquez. Pumanaw si Mike noong Martes ng hapon, mabilis na kumalat ang balita at sa buong magdamag na iyon, at hanggang sa maghapong kasunod puro siya ang pinag-uusapan. At ang sinasabi ay ang mga kabutihang kanyang ginawa. Nakatutuwa na hindi lamang ang GMA, maging ang ABS-CBN sa kanilang prime newscast na TV Patrol ay nagbigay ng tribute kay Mike, at lahat sila ay nagsasabing isa siyang mabuting tao.
Nakausap nga namin ang isang dating executive ng GMA, si Leni Parto, na nagsabi sa amin, “napakabait niyang si Booma at lagi siyang nakalaang tumulong kanino man na nangangailangan ng tulong niya, at hindi iyan iyong ang tulong niya ay hihingin niya sa iba, dudukutin niya iyon sa sarili niyang bulsa. Napaksaya pang kasama, basta masyado nang seryoso ang usapan, biglang magjo-joke iyan na nauuwi sa tawanan. Ang isa pang nakagugulat sa kanya, dahil siya ay umiikot sa buong PIlipinas dahil sa aming mga provincial stations noon, lahat sila ay nakakausap niya sa sarili nilang wika, ang daming salitang alam ni Mike.”
Puro papuri kay Mike ang aming narinig sa buong araw. Noong bandang hapon, nagtungo kami sa Santa Ana dahil may isa kaming kaibigang namatay din, at kahit na sa burol na ng ibang tao, si Mike pa rin ang pinag-uusapan. Totoo ngang hindi maaaring mamatay sa limot ang isang tunay na deboto ng Ina ng Walang Mag-ampon, Patrona ng Santa Ana sa Maynila simula pa noong 1770.
At saka sa totoo lang, isang mabuting tao naman talaga si Mike, ganoon din ang kanilang buong pamilya. Maging ang tatay niya ay naglilingkod din sa simbahan at deboto ng Mahal na Birhen. Naalala nga namin nang huling makita namin si Mike sa pista ng Birhen, naroroon siya sa harapan bilang Hermano Mayor at hawak niya ang alta barra, ang simbolo ng pamumuno sa debosyon sa loob ng isang taon.
At gaya ng sigaw ng lahat noon, Mabuhay si Mike Enriquez, Mabuhay ang Birhen ng Walang Mag Ampon.
