E.A.T. ibinalibag muli ang Eat Bulaga, It’s Showtime

HATAWAN
ni Ed de Leon

NAKALAMANG ang mga Jalosjos nang pinayagang i-extend ng IPO Phil ang registration ng trademark ng Eat Bulaga sa kanilang pangalan ng 10 taon pa. Pero kasabay niyon ay lalo naman silang ibinalibag sa ratings ng E.A.T. ng TVJ sa TV5. 

Sinasabing sa hearing noon ay hindi pinahintulutan si dating Sen Tito Sotto na magbigay ng testimonya matapos iyong tutulan ng abogado ng TAPE Inc. dahil umano sa hindi pagpapadala ng dating senador ng Judicial affidavit na hinihingi ng korte bago ang testimonya. 

Sinabi naman ng dating senador na may desisyon ang Supereme Court na kung hindi  magsumite ng judicial affidavit ay hindi ka na maaaring magsumite pa niyon pero hindi ipinagbawal ng Korte Suprema ang pagtayo bilang testigo. Gayunman sinasabi ngang iyan ay trade mark registration pa lang at diringgin pa ang kaso sa kung sino ang tunay na may-ari ng titulong Eat Bulaga. Didesisyonan pa iyon ng korte matapos na sila ay magharap ng mga saksi at ebidensiya.

Ang mahalaga lang para sa TVJ kahit na hindi nila magamit ang original na title at sinasabi sila ay nasa mas mahinang estasyon, inilalampaso pa rin nila sa audience share ang Eat Bulaga at ang It’s Showtime. Hindi naman maitatago sa pagbagsak ng audience share, na baka nga hindi magtagal at magsara na rin ang Eat Bulaga dahil inaalisan na rin sila ng sponsors. Mukhang iyan din naman ang nasa isip ng TAPE Inc. na mabawi man sa kanila ang title na Eat Bulaga, sira na rin naman iyon at kung paalisin nga sila ng GMA nakaabang naman ang Showtimena mas lalong pinalalalaki ng magkatulong na GMA at ABS-CBN dahil iyon ay collaboration nila, samantalang ang Eat Bulaga ay blocktime lang sa GMA 7. 

Maliwanag ang plano ng GMA na kung bumagsak man ang Eat Bulaga, mayroon agad silang Showtime na maipanlalaban sa TVJ. Ang TVJ naman ay anim na taon na lang ang hinihintay para makompleto ang kanilang 50 taong noontime show na masasabi ngang pinakamatagal na noontime show sa buong mundo ngayon pa lang. Isang bagay na hindi naman inaasahang makakaya ng  mga sumalo sa Eat Bulaga na kung susuwertihin siguro ay aabot naman ng mga ilang buwan o isang taon pa. 

Pero tiyak iyon, hindi na ie-extend ng GMA ang kanilang blocktime agreement dahil mas malaki ang kanilang kinikita sa collaboration sa Showtime, na hindi nila kinikita sa Eat Bulaga lalo na ngayon na mamemeligro pang hindi na sila mabayaran dahil halos ubos na ang sponsors ng show. 

Babalik tayo ngayon sa tanong, mas mahalaga ba ang title kaysa mataas na ratings na nangangahulugan ng malaking kita?