HATAW! D'yaryo ng Bayan hatawtabloid.com
HATAWAN
ni Ed de Leon
HIHINTAYIN natin ang labanan sa Sabado. Magce-celebrate ng 44 years ang Eat Bulaga kahit na hindi na nila kasama ang mga host noon ng 43 taon.
Ang katuwiran nila, sa kanila ang trade mark at iyon ang tumagal ng 44 years. Sa TVJ naman sa TV5. Magce-celebrate sila ng ika-walong taon ng AlDub, ang nilikha nilang love team na kumayod sa record ng pinakamaraming likes sa buong mundo.
Kulang din naman ang kanilang celebration dahil ang kalahati ng love team, si Alden Richards ay tiyak namang hindi papayagan ng GMA 7 na lumabas sa TV5.
Pero kung kami ang taga GMA 7, papayagan namin si Alden. Kasi maaari ngang lalo silang malampasan sa ratings kung lalabas pa si Alden sa TV5, pero dapat din nilang isipin na makadaragdag iyon sa popularidad ng kanilang artista na hindi naman nila kayang ibigay. Ang tagal na nga ni Alden sa GMA 7, hindi halos npansin kaya ibinigay nila sa Eat Bulaga ng TVJ noon.
Doon siya napansin nang makasama naman niya ang baguhang si Maine Mendoza, na sinakyan naman ng TVJ kaya lalong na-build up. Kung hindi ba dahil sa AlDub, sisikat nang ganyan si Alden? Natangay din si Alden nang gumawa siya ng pelikula na kasama si Kathryn Bernardo, pero ipahihiram ba ng ABS-CBN si Kathryn para makatambal muli ni Alden kahit sinasabi ng GMA na tapos na ang network war?
Siguro nga sa ngayon palagay nila wala na ang network war dahil wala nang prangkisa ang ABS-CBN, pero para sa ABS-CBN hindi pa tapos ng laban, hindi lang kumikibo iyan dahil naipapalabas nila sa GMA ang ilang shows na ginagawa nila kabilang na ang It’s Showtime, pero basta nakagawa ng paraan iyan na makakuha ng prangkisa, laban na naman iyan. Hindi malabo iyon, nabuksan na nga nila ang radio station nila eh, makakahanp din iyan ng paraan na mabuksan ang tv station nila.
Basta nangyari iyan, tapos na rin ang mga collab nila. Giyera na naman iyan ng Madre Ignacia at Kamuning.
Sino ang mananalo, ang 44 years anniversary na wala ang pinagmulan o ang ikawalong anibersaryo ng AlDub na hanggang ngayon ay sinusundan ng milyong tao? Magpapatalo ba ang AlDub Nation?
