HATAW! D'yaryo ng Bayan hatawtabloid.com
HATAWAN
ni Ed de Leon
SANA naman patahimikin na nila ang namayapang matinee idol na si Rico Yan. Kung kailan dalawang dekada na siyang yumao at saka pa nakaladkad sa isang controversy ang pangalan niya. Iyon ay nangyari nang biglang sabihin ng bold star na si Sabrina M na naging magsyota raw sila ng dalawang taon lhanggang sa yumao na nga ang aktor.
Noon naman, wala ni tsismnis na nagkaroon sila ng relasyon.
Ang paliwanag ni Sabrina, napaka-wholesome raw kasi ng image ni Rico kaya nila itinago iyon dahil tiyak na maaapektuhan siya kung malalamang ang syota niya ay si Sabrina na bukod sa mas matanda sa kanya ng ‘di hamak ay bold star pa. Pero kung iyon nga ang katuwiran
nila noon, bakit ngayon ay inilabas pa iyon ni Sabria, kung kailan wala na nga si Rico para maipagtanggol ang kanyang sarili?
Maraming itinuturo si Sabrina na nakaaalam daw ng kanilng relasyon, pero mas maraming mga taong close kay Rico pati na ang kapatid niyang babae na si Tina, na sinasabing close sa aktor ay hindi naniniwalang totoo ang sinabi ni Sabrina dahil ni minsan hindi man lang iyon nabanggit ni Rico sa kanya.
Maski na ang best friend umano ni Sabrina, ang dati ring bold star na si Katrina Paula ay nagsabing hindi siya naniniwala sa sinabi ng kaibigan.
“Puwedeng nagkatikiman lang sila pero hindi nagkaroon ng relasyon,” sabi ni Katrina.
Sinabi pa ni Katrina na mabait na tao si Rico at hindi niya matiis na hindi magsalita tungkol sa mga bagay na iyon.
Maging ang mga press people na madikit kay Rico ay nagsabing wala silang alam na nagkaroon iyon ng relasyon kay Sabrina. Ang suspetsa nila, nag-iingay lang si Sabrina dahil may ilalabas na isa niyang pelikula at gusto niyang mag-comeback sa showbusiness. Pero bakit si Rico?
Siguro nga ang matinee idol ang naisip niya dahil sabi nga ni Katrina, “talagang noon pa man ay crush niya si Rico, at naisip siguro niya na tutal patay na iyon, ayos na kahit na ano ang sabihin niya. Hindi naman siguro niya akalain na ganyan karami ang papalag.
Pero dahil nasabi na niya, pinaninindigan na ni Sabrina na nging syota niya si Rico. Hindi umano siya hihingi ng paumanhin kahit na kanino dahil sa mga sinabi niya dahil iyon ang totoo.
Sa ngayon ay hundi na natin malaman kung sino nga ba ang nagsasabi ng totoo pero lahat halos ay salungat sa sinasabi ni Sabrina, na siya lang naman ang nagsasabi.
