Direk Jun Miguel itinanghal na Asia’s Outstanding Director sa Vietnam International Achievers Award 2023

MATABIL
ni John Fontanilla

ISANG malaking karangalan para sa dating member ng That’s Entertainment at ngayo’y isa ng awardwinning director na si Jun Miguel ang mabigyan ng karangalan sa ibang bansa, sa Vietnam International Achievers Award 2023 bilang Asia’s Outstanding Movie and TV Director.

Ayon kay Direk Jun, “Sobrang thankful ako sa pamunuan at jury ng Vietnam International Achievers Award  sa karangalang ibinigay nila sa akin bilang direktor.

“Ang parangal na natanggap ay iniaalay ko sa Diyos, sa aking pamilya, sa aking masisipag na crew at sa mga taong naniniwala sa aking talento.

“Hopefully ito na ang simula na mapansin pa lalo sa ibang bansa ang husay ng Filipino, dahil talaga namang magagaling ang mga Pinoy.”

Kasamang lumipad ng Vietnam at tumanggap ng kanyang award ni Direk Jun ang kanyang magandang maybahay  at anak na commercial model/actor na si Jhustine Miguel.

Sa ngayon ay abala si Direk Jun sa kanyang mga ginagawang short films, children show ang Talents Academy na itinanghal na Asia’s Best Children Show sa Vietnam International Achievers Award at sa bagong teen show ng IBC 13 na mapapanood sa buwan ng Mayo.