Shira Tweg tuwang-tuwa sa pagiging Sharon Cuneta

MATABIL
ni John Fontanilla

NAG-UUMAPAW ang talento ng baguhang young star na si Shira Tweg, alaga ng sikat na celebrity make up artist si Bambbi Fuentez.

Bukod sa mahusay umawit, sumayaw, at umarte, si Shira ay matangkad at napakaganda na puwedeng pang beauty queen.

Pero mas priority ni Shira ang singing na ngayong taon ay iri-release na ang kanyang kauna-unahang awitin na mula sa komposisyon ng mahusay na song writer at direktor na si Joven Tan.

Isa rin ito sa cast ng inaabangan at pinag-uusapang pelikula na entry ng Saranggola Media ni Edith Fider sa kauna-unahang Summer MMFF 2023, ang Kahit Maputi Na Ang Buhok Ko na hango sa buhay at musika ni Maestro Rey Valera. 

Rito ay ginagampanan ni Shira ang role bilang si Sharon Cuneta na sumikat sa awiting Mr DJ na si Maestro Rey ang nag-compose. Sobrang proud nga ni Shira na mabigyan siya ng pagkakataong  magampanan ang role bilang Sharon na isa sa tinitingalang singer at aktres sa bansa.

Very thankful si Shira sa Saranggola Media, Kay Ms Edith, direk Joven, sa kanyang manager, at very supportive parents  lalo na sa kanyang always kasama na mommy na si Tita Tine Areola.

Makakasama ni Shira sa Kahit Maputi Na Ang Buhok Ko sina Rk Bagatsing, Dennis Padilla, Rossana Roces, Gelli De Belen, Ariel Rivera, Christopher De Leon atbp. at mapapanood simula April 8 sa mga sinehan.