Jenine aktibo pa rin sa pagkanta

HATAWAN
ni Ed de Leon

HINDI namin agad siya nakilala kasi naka-face mask noong makita namin sa preview ng Kahit Maputi na ang Buhok Ko: The Music of Rey Valera. Kasama siya sa pelikula pero ang biro nga niya,” maikli lang ang role ko, puwede ngang wala.” Maikli nga lang ang role, halos dinaanan lang ng camera, pero sino ba naman ang hindi makakakilala kay Jenine Desiderio?

Active pa rin sa Jenine sa kanyang career bilang isang singer, pero hindi na nga siya masyadong visible kagaya noong araw,

kaya kung sabihin nanay na lang siya ni Janella Salvador. Pero iyang “nanay” na iyan, minsan ding naging Kim sa Miss Saigon, bukod sa kasama nga siya sa original cast noon nang unang ilabas sa London.

Nang magbalik sa Pilipinas, hindi lang siya isang singer, naging artista rin naman siya at maraming nagawang pelikula.

Higit sa lahat, kung sabihin nga noong araw eh, iyang si Jenine ang isa sa pinaka-disiplinadong artista na hindi kailanman naging sakit ng ulo ng kanyang manager.

Ilang taon na rin ba kaming hindi nagkikita? May isang dekada na rin yata kaya nagkagulatan pa kami sa preview ng film bio ni Rey Valera.