HATAW! D'yaryo ng Bayan hatawtabloid.com
HATAWAN
ni Ed de Leon
IYANG pelikulang gagawin nina Ate Vi (Ms Vilma Santos) at Boyet de Leon sa Japan, bale iyan na ang kanilang ika-25 pagtatambal sa pelikula. Ang mga pelikula nilang nagawa through the years ay naging box office hits lahat, at ang iba ay itinuturing na ngang mga klasikong pelikula sa ngayon. Pinakamatindi ngang pelikulang nagawa nila na hanggang ngayon ay nasa isip pa rin ng mga tao ay iyong Relasyon, na si Ate Vi ay nanalo ng grandslam bilang best actress.
Matagal na rin naman ang huli nilang pelikulang magkasama.
Dalawang dekada na yata ang nakaraan nang gawin nila ang Mano Po III, My Love para sa Metro Manila Film Festival 2004. Kaya nga sinasabi naming napalaking challenge itong pagsasama nilang muli sa isang pelikula. Hindi naman kailangang lampasan ang kita ng nauna nilang pelikula, dahil malaki ang kaibahan ng patronage ng mga nanonood ng sine noon at ngayon,
Ngayon ay medyo mahirap ang buhay, at magastos na ang manood ng sine, pero siyempre Vilma-Boyet iyan kaya iba ang inaasahan nila.
Sa kuwento ni Ate Vi, naiiba ang pelikula at medyo experimental maging ang kuwento.
“Pero kailangan ganoon eh. Nasa stage tayo na hindi natin alam kung ano ang gustong mapanood ng mga tao sa panahong ito. Marami nang magagandang pelikulang nailabas, pero hindi masasabing naabot na iyong dating status ng industriya.
“Kailangan mapag-aralan natin kung ano ang dapat na trend. Kaya ako nga ready ako na gumawa ng iba’t ibang genre ng pelikula, kasi iyan lang ang paraan para makita natin kung ano ang gusto ng mga
tao. Pagkatapos nito gagawin ko iyong pelikula with direk Erik Matti para iba naman. Kung ganoon ang gagawin natin mai-establish natin kung anong klaseng pelikula nga ang dapat nating ginagawa.
“As I’ve said ang hinahanap naman natin ay mga pelikulang magbabalik sa industriya, back on its feet. Malaki ang utang na loob ko sa industriyang ito, not by just supporting my career for 60 long years, maski iyong aking 24 years in public service, hindi mangyayari iyon kung hindi ako si Vilma Santos,” sabi ni Ate Vi.
