Theresa wala pang puwang na patawarin si Cesar

HATAWAN
ni Ed de Leon

DIRETSAHAN iyon, sinabi ni Theresa Loyzaga na natutuwa siyang talaga na nagkakasundo na ang kanyang anak na si Diego at ang tatay niyong si Cesar Montano. Ikinatutuwa rin niya ang pagkakasundo ni Sunshine Cruz na kaibigan niya at ang dating asawa niyon na si Cesar, pero inamin niyang mukhang para sa kanya ay wala pang puwang para magkasundo sila ng aktor.

Hindi namin masisisi si Theresa. More or less, alam namin kung paano nagsimula ang kanilang relasyon at kung paanong natapos iyon, bago pa man niya isilang si Diego. Alam din naman namin ang dinaanan niyang hirap sa buhay dahil sa pangyayaring iyon. Totoo namang madaling magpatawad pero mahirap makalimot.

Kung tutuusin, kahanga-hanga pa nga si Theresa, dahil nananatili siyang kalmado sa kabila ng lahat ng kanyang dinaanan sa buhay, pero tama siya na hindi puwedeng biglain ang lahat. Maaaring dumating ang araw na makalimutan na rin nila ang madidilim na kabanata ng kanilang buhay, o tuluyan ding malimutan ang buong kabanatang iyon.

Basta kami bilib kami kay Tong.