Kailan naging national costume ang Darna?

HATAWAN
ni Ed de Leon

HINDI naman siguro kasalanan ni Jane de Leon o ng mga gumagawa ng Darna sa ABS-CBN, iyong pagkatalo ni Celeste Cortesi sa Miss Universe. Hindi naman sila ang nagsabing magsuot ng costume ni

Darna sa national costume competition.   

Iyon ang alamin kung kaninong idea iyon, dahil kahit kailan, wala kaming alam sa kasaysayan na mga Flipino na nagsuot ng costume ni Darna sa alin mang panahon, maliban sa komiks, sa pelikula, at ngayon sa tv. Paanong naging national costume iyon?

Palagay din naman namin, hindi babaeng organizer ang nakaisip ng ganoon. Kung iyan nasa ilalim pa ng Binibini, ewan kung

maiisipan ni Stella Marquez Araneta iyong pagsuotin iyon ng Darna.

Bakit sa US ba inangkin na nilang national costume ang damit ni Wonder Woman? Anong bansa na ba ang gumawa ng ganyan?

Hindi dahil sinasabing hindi nakalipad nang husto si Darna, dahil sa binago nga siguro nila ang istorya at malayo na sa orihinal ni Mars Ravelo, maliban sa pangalan ng main characters, hindi nila na-build up nang husto si Jane. Ang totoo nakatatak pa rin sa isip ng tao ang huling artistang nag-Darna, si Angel Locsin.

Ang tindi naman kasi ng dating ni Angel noon. Hindi pa umaarte, nakatayo pa lang napapatunganga na sila.