Gabby lucky charm nina Sunshine, Ryza, Sanya  

HATAWAN
ni Ed de Leon

KUNG sabihin nga nila, isa si Gabby Concepcion sa pinakasikat talagang actor sa Pilipinas. Sino ba ang mag-aakalang matapos siyang mawala ng 13 taon sa Pilipinas, dahil sa isang kasong hindi naman niya kasalanan kundi nadamay lang siya, ay makababalik pa siya sa dati niyang popularidad?

Hindi agad-agad, para siyang nagsisimula ulit. Pero nakatutuwa naman na nakabalik siya sa dati niyang popularidad at higit pa. May isang bagay pa siyang napatunayan, na kahit na sino ang itambal sa kanya, makakaya niyang dalhin. Hindi naman ganoon kalaking star noong araw si Sunshine Dizon, at lalo naman si Ryza Cenon, pero nang makasama nilang dalawa si Gabby sa isang hit afternoon series, biglang taas din ang kanilang popularidad, at siguro nga mas malaki pang stars ngayon kung hindi nga lang napaso ang franchise ng ABS-CBNna nilipatan nila noon.

Sino ba ang makapagsasabing maaaring leading lady si Sanya Lopez, pero matapos ang dalawang seryeng kasama si Gabby, star na rin si Sanya on her own. Ibig sabihin, naroroon pa rin ang lakas ni Gabby sa publiko.

Pero hindi dapat panghawakan iyan nang husto. Hindi dahil sa ganoon kalakas si Gabby dapat na niyang isugal ang kanyang career sa paggawa ng mga proyektong ang kasama ay kung sino-sino. Dapat pag-aralan niya ang lahat ng kanyang gagawin. Baka kung may makabatak sa kanya pababa, hindi na siya maka-remate ulit. Kailangang ingatan niya ang kanyang career dahil may mga anak pa siyang maliliit.

Kailangan ngang pangalagaan nang husto ang kanyang career at nagsisimula iyan sa kung anong proyekto na gagawin niya at kung sino ang makakasama niya.

Cuidado!