HATAW! D'yaryo ng Bayan hatawtabloid.com
HATAWAN
ni Ed de Leon
NAG-VIRAL ang isang video ni James Reid na nakitang may hinahalikan siyang isang kaibigang lalaki. Eh alam naman ninyo kung gaano kamalisyoso ang mga Filipino, kung ano-ano na namang tsismis ang ginawa ng mga Marites.
Marami kaming narinig na tsismis tungkol kay James noong una pa man, pero ni minsan hindi kami nakarinig ng kuwentong bading siya. Walang may duda sa preference ni James. Lalaki iyan.
Isipin ninyo, gaano katagal silang nag-live in ni Nadine Lustre at open book naman ang kuwentong iyan. Ibig sabihin sa loob ng panahong iyon ay walang nahalata si Nadine kung “may bahid” si James?
Isa pa, si James ay isang Australian. Iyon ang nakagisnan niyang kultura. Sa kanila ang halik ay isang pagbati lamang. Hindi mo masasabing dahil hinalikan niya ang kaibigan niya ay may relasyon na sila, o bading na si James.
Iyang mga ganyang diga ng mga Marites ang hindi na maganda. Basta may nakita kayo, isipin muna ninyo kung bakit nangyari ang nakikita ninyo. Hindi lahat ng tao ay tutugon sa inyong standards. Mayroong iba na iba talaga ang standards sa buhay. Kahit nga sa amin eh, may mga kaibigan kami kahit na lalaki na basta nagkita kami ay humahalik. Tanda lang iyon ng pagbati. Iba-iba ang kaugalian ng mga tao. Hindi ninyo maaaring sabihin na dahil nandito sila sa Pilipinas kailangang sundin nila ang standards pati ng mga Marites sa Pilipinas.
Basta sa mga bagay na iyan hindi kami pabor at kahit na tsismis, hindi namin kakagating bading si James.
Sobra naman iyang tsismis na iyan. Ang nagpasimula niyan dapat nang ibitin nang patiwarik.
