HATAW! D'yaryo ng Bayan hatawtabloid.com
SHOWBIZ KONEK
ni Maricris Valdez Nicasio
MASUWERTE sina Kathryn Bernardo at Daniel Padilla dahil muli nilang nakasama ang kinikilala nilang mga ina sa industriya na sina Cathy Garcia- Molina, Mae Cruz Alviar, at Olivia Lamasan. Ito’y sa 2 Good 2gether: A Special Reunion documentary na napanood kahapon sa ABS-CBN Entertainment YouTube channel.
Ang dokyu ay bahagi ng pagdiriwang ng KathNiel ng kanilang ika-10 taon na binalikan ang mga pinagdaanan nila kasama ang tatlong batikang direktor.
Malaking bahagi ng KathNiel ang tatlong batikang director na nasa likod ng ilan nilang blockbuster films sa nakalipas na 10 taon. Marami ang kinilig sa pag-amin ni Direk Cathy na hanggang ngayon ay hindi niya alam kung kailan naging magkasintahan ang dalawa. Tanong nga nito kina Kathryn at Daniel, “So wala pang kasal?”
Natanong din ni Direk Mae kung may panghihinayang o pinagsisihan sina Kathryn at Daniel. Sagot ni Kathryn, “Sana mas nagtiwala ako sa sarili ko matagal na.”
Inalala naman ni Inang ang unang pagkikita nila ni Daniel. “Una ko silang naidirehe sa ‘Pangako Sa Yo.’ Si DJ parang tadpole,” ani Inang. Sumakay naman si DJ sa biro, “Paki-zoom-in nga po. Am I tadpole?”
At dahil ina na ang turing nina Daniel at Kathryn sa tatlong box-office directors, tinanong din ng dalawa kung naniniwala pa ang tatlo sa kanila at kung tama pa rin ba ang kanilang tinatahak.
