Sunshine maghihigpit ba kapag niligawan na ang mga anak?

HATAWAN
ni Ed de Leon

NAGSISIMULA na raw magtanong ang panganay na anak ni Sunshine Cruz kung ano ang kanyang rules sa “pag-inom” dahil nasa edad na naman siya na karaniwang simula ng”social drinking.” Nagtatanong na rin daw iyon ng rules sabpakikipag-boyfriend kung sakaling may manliligaw na nga sa kanya, o baka naman may manliligaw na kaya nagtatanong na ng rules.

Magiging mahigpit bang nanay si Sunshine?

“I was her age noong magsimula akong magtanong din nang ganyan. Noon mas conservative ang parents ko. Kahit na sabihin mong sanay din sila sa showbusiness dahil sa father ko, mahigpit sila. Noon hindi ko sila maintindihan kung sinasabi nilang hindi ganoon kadali iyon. Ngayon na-realize ko na tama sila. kung hindi ako naging pabigla-bigla noon, at hinayaang umiral ang emotions ko, siguro hindi ako separated ngayon. Pero hindi naman ako nagsisisi dahil nagkaroon

ako ng mababait na mga anak.

“Pero just imagine, kung ganyan ang mga anak mo, tapos buo pa ang pamilya mo, hindi ba mas maganda. Iyon nga lang na-realize ko na siguro nga kahit na ano mapagtitiisan ko alang-alang sa pamilya,

pero hindi ko kayang i-tolerate ang shared family. Doon ako nagkamali kaya ginawan ko ng paraan, at ang nakita ko lang solusyon talaga ay makipaghiwalay,” sabi ni Sunshine. 

“Pero alam ko hindi iyan ang ideal situation lalo na para sa mga anak ko, pero wala akong magawa eh, iyon lang ang nag-iisang solusyon na puwede kong gawin. Wala na akong choice noon kundi makipaghiwalay. Salamat naman sa Diyos na noong mahiwalay ako, nakabalik ako sa aking career kaya nagawa kong buhayin ang mga anak ko kahit na ako ay nag-iisa.

“Sa mga anak ko, hindi ako mag-iimpose ng rules. Bubuksan ko lang sa kanila ang buhay ko, ang mga pagkakamali ko, at siguro nga ang only rule, iwasan din nila ang mga nagawa kong pagkakamali noong araw para maging mas maganda ang kanilang buhay,” sabi pa niya.

Paano kung may dumating na lang sa bahay niya na manliligaw ng kanyang anak?

“Just like any mother, siguro may ilang questions din ako para may idea naman ako kung sino nga ba ang manliligaw ng anak ko. Pero siyempre ang lahat ng desisyon ay sa kanila. Pinalaki ko ang mga

anak ko na marunong gumawa ng sarili nilang desisyon,” sabi pa niya.